Tərtib edən: Səid Mirzai Giriş İkinci Qüds Günündən bir xatirə

Dördüncü bölmə: Cinayətlər

Qəddarlıq

Sionistlərin rəftarı o qədər vəhşicəsinə, insani mürüvvət və mərhəmətdən uzaqdır ki, Fələstində iş başına gəlmiş bu gənc nəsli təbii şəkildə təngə gətirmişdir; daha taqətləri bitmişdir və dözə bilmirlər. Sionistlər elə bilirlər ki, qəddarlıq etsələr, tank gətirsələr, top atsalar və kimyəvi silahlardan istifadə etsələr, xalqı sakitləşdirəcəklər. Bəli, təzyiqi artırıb bir dövrdə xalqı sakitləşdirmələri mümkündür, lakin boğazlarda düyünlənmiş nifrəti məhv edə bilməzlər. Onlar məhvediləsi deyil. Onlar elə tufan qoparacaqlar ki, bütün saraylar uçacaq.³⁴²

Cinayətlərin məqsədi

Bu xoşagəlməz və çirkin faciə sionist hakimlərin qanunsuz istəklərinin sülh müzakirəçilərinə qəbul etdirilməsi məqsədilə həyata keçsə də, qorxmaz Fələstin xalqı bu müzakirələri qınayacaq. Bu mübarizələr ilahi yardım vədləri ilə bir gün səmərəyə çatacaq, tutulmuş torpaqlar azad ediləcək və tarac olunmuş sərvətlər əsl sahiblərinə qayıdacaq.³⁴³

İsrailin misilsiz cinayətləri

Fələstin məsələsində üç əsas cəhət var. Bu üç cəhət tarixin yadında qalacaq:

Birinci cəhət bu gün sionistlərin törətdiyi misilsiz zülm və cinayətdir. Bu, tarixdə qalasıdır. Bir gənc bu qədər əzab çəkdikdən və müsibət gördükdən sonra öz canını fəda edir ki, evini işğal edənə bir zərbə vursun; özü də şəhid olur. Onlar gəlib bu gəncin evini, ata-anasının evini dağıdırlar, ailəsinə işgəncə verirlər. Tankla düşərgələrə və şəhərlərə girirlər, evlərə hücum edirlər, evləri, tarlaları dağıdırlar, insanları öldürürlər. Silahsız fələstinli gənci, uşağı, qocanı və qarını öldürmək indi gündəlik bir iş olub. Bu, qəribə haldır, doğrudan da tarixi bir hadisədir. Bu, tarixdə qalacaq.
Beynəlxalq təşkilatların və dövlətlərin sükutu

Üçüncü cəhət beynəlxalq təşkilatların və dövlətlərin sükutudur. Bu hadisələr insan hüquqlarına bu qədər eşq bəsləyən, ürəkləri insan hüquqları üçün bu qədər yanan bu avropalı cənabların gözləri qarşısında baş verir, lakin çox yerdə susur, çox yerdə zalım tərəfə kömək edirlər. Doğrudan da təəccüblüdür. ABŞ heç, ABŞ-ın özü cinayətin şərikidir. ABŞ hökumətlərinin qolu dirsəyə qədər fələstinlilərin qanına batmışdır. Əgər bir məhkəmə fələstinlilər barədə hökm çıxarmalı olsa, onun müttəhimi təkcə Şaron və sionistlər olmayacaq, həm də ABŞ, Buş, Ağ ev və Amerika hökumətləri olacaq. Bunlar da ittihamın birinci sırasındadırlar. Amma onlar heç, söhbət beynəlxalq təşkilatlardan, Birləşmiş Millətlər Təşkilatından, insan hüquqlarından bu qədər dəm vuran, lakin insan hüquqlarını həqiqətən, tanımayan və onlara əsla hörmət etməyən Avropa dövlətlərindən gedir. Əlbəttə, bu, digər dövlətlərin, həmçinin müsəlman dövlətlərinin də problemidir. Bunların sükutu doğrudan da təəccüblüdür.³⁴⁴

İyirminci əsrin böyük biabırçılığı

Fələstin məsələsi bitməkdə olan bu əsrin böyük biabırçılıqlarından biridir. Əlbəttə, bu əsrin rüsvayçı ləkələri çoxdur, amma ən çirkinlərindən biri, bəlkə də demək olar ki, birincisi Fələstin məsələsidir. Nə üçün? Çünki bu məsələdə bir xalqı öz ölkəsindən qovdular. Mən xahiş edirəm ki, Fələstin məsələsi ilə çox tanış olmayan gənclər bu sözlər üzərində diqqətlə düşünsünlər. Bir xalqı öz evindən, ölkəsindən qovub onların yerinə dünyanın müxtəlif yerlərindən bir qrup insan gətirdilər. Nə üçün? Çünki dünyanın müxtəlif yerlərindən toplanan həmin insanlar bir irqdəndirlər: İsrail irqindən, yəhudi irqindən; yəni çirkin irqçi bir hərəkət! Dünyanın harasında və kimin vasitəsilə çox kiçik miqyasda belə bir iş baş tutsaydı, ayıb və rüsvayçılıq sayılardı, amma bunu bir dövlət səviyyəsində etdilər. Kim etdi? Əslində, İngiltərə, sonra da ABŞ.³⁴⁵

Qəzzə cinayətləri

Digər tərəfdən tarixi Qəzzə hadisəsində sionist cinayətkarların törətdiyi cinayətlər - mülki əhalinin kütləvi qırğını, müdafiəsiz evləri dağıtmaq, südəmər körpələrin sinəsini dəlmək, ibtidai məktəbi və məscidi bombalamaq, fosfor bombaları və digər qadağan olunmuş silahlar işlətmək, yeməyin, dərmanın, yanacağın və xalqın digər zəruri ehtiyaclarının yolunu iki ilə yaxın bir müddətdə bağlamaq və digər çoxlu cinayətlər sübut etdi ki, qondarma sionizm dövlətinin başçılarında olan vəhşilik və cinayət hissi Fələstin faciəsinin ilk onillikləri ilə əsla fərqlənməmişdir. Deyr-Yasin, Səbra və Şətila faciələrini yaradan həmin yırtıcılıq və rəhmsizlik xislətidir, həmin siyasət bu gün də dövrün tağutlarının zülmət beyninə və qəlbinə hakimdir. Əlbəttə, bu gün texnologiyanın inkişafı sayəsində cinayətin dairəsi də çox genişlənmiş və daha faciəli olmuşdur.³⁴⁶

Qəzzə xalqının müqavimət amili

Əgər Fələstin xalqının bu möhtəşəm müqaviməti olmasaydı, son illərdə Fələstinin mövqeyinin güclənməsi və müqavimətin inkişafı mümkün olmazdı. Doğrudan da Fələstin xalqı, Qəzzə xalqı tarixdə öz adlarını ən müqavimətli xalq kimi əbədiləşdirdilər.³⁴⁷

İntifazələrin başlandığı və həqiqi müqavimətin formalaşdığı son bir neçə il ərzində Fələstin xalqının gördüyü iş möhtəşəm olmuşdur. Bu, ilahi hidayətdən və Allahın yardımından başqa bir şey deyil. İnsan Qəzzədə bu qədər müsibəti, bu qədət təzyiqi - istər müharibənin olduğu iyirmi iki gün ərzində, istərsə də ondan sonra bu günə qədər xalqın bir-birinin ardınca gələn fəlakətlərlə üzləşdiyini görür, amma bu xalq dağ kimi möhkəm dayanmışdır. Bu, çox möhtəşəm bir məsələdir. Bunu görməzdən gəlmək olmaz.³⁴⁸
Qəzzənin yenidən qurulması

İndi Qəzzənin yenidən qurulması məsələsi Fələstinin ən təcili işlərindən biridir. Fələstinlilərin böyük əksəriyyəti tərəfindən seçilən və Fələstinin son yüzillik tarixində müqavimət və qəhrəmanlığın ən parlaq zirvəsi olan Həmas hökuməti bütün yenidənqurma fəaliyyətlərinin mərkəzi olmalıdır. Yaxşı olar ki, misirli qardaşlar yardım yolunu açıb müsəlman xalqların bu mühüm məsələ qarşısında vəzifələrinə əməl etmələrinə imkan yaratsınlar.³⁴⁹

Hizbullaha məğlubiyyətin intiqamı

Otuz üç günlük müharibədə Hizbullahın qələbəsindən sonra İsrailin gördüyü işlərdən biri Fələstin məsələləridir. Fələstində baş verənlər bir qədər də İsrailin Livan hadisəsində rüsvayçılığını düzəltməkdən ötrüdür. Bu təzyiqlərin mühüm bir hissəsi - Fələstində xalqın gündəlik qırğını, istər şərq sahillərində, istər Qəzzədə müxtəlif bölgələrə hücum o rüsvayçılığı düzəltməyə görədir. Onlar Həmas hökumətini devirmək istəyirlər. Mənim burada fələstinli qardaşların diqqətini yönəltmək istədiyim və ərəbcə çıxışda da qeyd olunan məqam budur ki, biz, Fələstin xalqı və bütün müsəlman xalqlar diqqətli olmalıyıq ki, "işğalçı əleyhinə xalq" amilini "xalq əleyhinə xalq"a çevirməsinlər. Düşmən buna çalışır: fələstinlilər qarşısında fələstinlilər, iraqlılar qarşısında iraqlılar. Hamı bundan ehtiyatlı olmalıdır. Bu gün birlik hamı kimi Fələstin xalqının da ən zəruri ehtiyacını təşkil edir.³⁵⁰

İsrailin cinayəti və diktatorluğu

Xarici siyasətdə bizim ən mühüm məsələmiz Fələstindir. Fələstin məsələsi təkcə bir xalqın məsələsi deyil, beynəlxalq diktatura və zor hakimiyyəti məsələsidir. Siz görün bu gün Fələstin ərazilərində nə baş verir. İşğalçı və qondarma İsrail dövləti özünün hərbi qüvvəsi, tankı, təyyarəsi, rəhmsizliyi və zülmü ilə Fələstin şəhərlərini mühasirəyə almışdır. Bir-bir bu şəhərlərə daxil olur, xalqı qətliam edir, evləri uçurur; bir gün Ramallah, bir gün Nablos, bir gün Cənin, bu gün də əl-Xəlil və digər şəhərlər. Bu şəhərlərdə yaranan faciələr vəsfəgəlməzdir; hərbi qüvvə bir şəhərə daxil olub qadını, kişini və uşağı tutur, öldürür, yaxud yaralayır. Bu gün bu şəhərlərdə on minlərlə yaralı və minlərlə şəhid vardır. Minlərlə gənci evlərindən oğurlayıb naməlum yerlərə aparmışlar və saysız-hesabsız evləri uçurmuşlar. Eşitdim ki, Cənin şəhərində evlərin yetmiş faizi dağıdılmışdır. Tanklar bir şəhərin yetmiş faiz evlərini dağıdır. Və bu cinayətlər bəşəriyyətin gözü önündə baş verir.

Bu işlərin mənası nədir? Bu işlərin mənası odur ki, heç bir bəşəri, insani, dini və ilahi qanunu saymayan zalım bir dövlət bu faciələri törədir. ABŞ kimi bir dövlət də tam və yüzfaizli şəkildə onu himayə edir, bütün insan hüquqları şüarlarını, xalqları, demokratiyanı, azadlığı və hər bir şeyi müdafiə devizlərini unudur. Dünyanın vicdanı hərəkətə gəldi, amma ABŞ-ın və Ağ evin başçılarının vicdanı azca da tərpənmədi.³⁵¹
Cinayətlərdə İsrailin məqsədi

Bunlar dünyaya iki şeyi başa salmaq istəyirlər: biri budur ki, bu xərçəng vəzisi nəyin bahasına olursa-olsun, qalmalıdır; ikincisi isə budur ki, siz bu gün hegemonizmlə üz-üzəsiniz. Biz hegemonluq etmək istəyirik, kim nə demək istəyirsə-desin. Yəni dünya xalqını qane etmək istəyirlər ki, ABŞ-ın hərbi gücü qarşısında heç kim heç bir şeyə qadir deyil.

Əlbəttə, indiyədək məğlub olmuş və bütün bu qüdrətli çıxışlara rəğmən, öz məqsədlərinə çatmamışlar. Nə üçün? Çünki Fələstin təslim olmamışdır. Onlar təzyiqlə, qırğınla, rəhmsizliklə və bütün insani dəyərləri tapdamaqla Fələstin xalqını təslimə vadar etmək, onun qolubağlı şəkildə onların boyunduruğu altına girməsini və özünün haqlı istəklərindən əl çəkməsini istəyirlər. Amma indiyədək bacarmayıblar. ABŞ və İsrailin təsəvvürünün əksinə olaraq, əsas zorakılıq deyil, insanların bütün məsələlərdə son sözü deyən iradə və imanlarının gücüdür. Bu məsələdə də belə olacaq.³⁵²
Misilsiz insani faciələr

Bu gün Fələstin ölkəsinin fələstinlilər yaşayan torpaqlarında baş verən hadisə misli görünməmiş insani faciədir. Fələstin tarixində də biz bunun belə şiddətli, qəddar və daşürəkli bənzərini görməmişik. Fələstində baş verən cinayətlər həqiqətən, dəhşətlidir. Qondarma sionizm dövləti hərbi imkanlarla, tankla, əsgərlə - eşitmişəm ki, təxminən otuz min canlı qüvvə və yüzlərlə tank yeritmişlər - şəhərlərə girir və faciə törədirlər. Ramallah, Nablos, Qəzzə, Xan Yunis, Beytülləhm, Rəfəh şəhərləri və fələstinlilər yaşayan digər bölgələr bu cinayətlərə məruz qalmışlar. Elə işlər görürlər ki, biz özümüzə yaxın dövrlərdə bunun belə şiddətli və qəddar bənzərini heç bir yerdə görməmişik; bu şəhərlərdə və düşərgələrdə evləri dağıdırlar, tank və buldozerlə fələstinlilərin kiçik evlərinin canına düşürlər, ailələri didərgin salırlar, qarşılarına çıxan insanı öldürür və heç nədən çəkinmirlər. Eşitmişəm ki, on üç yaşdan əlli yaşa qədər gəncləri və kişiləri tuturlar. Bu ailələrin kişilərinin çoxunu, xüsusən də gənc və yeniyetmələri tutub naməlum bölgələrə aparmışlar. Bu həbsxanaların daxilindən bayıra sızan və dünya mətbuatında dərc olunan xəbərlər göstərir ki, onlara işgəncə verir, hətta içəridə də qollarını bağlayırlar. Beytülləhmdə məscid və kilsələrə hücum edir, yaralılara təcili tibbi yardım, ərzaq və dərman çatdırmağa mane olurlar. Söylənilənlərə əsasən, hətta təcili yardım maşınlarını da atəşə tuturlar və bu hadisələrin yaralılarının çoxu qanaxma və dərmansızlıq səbəbindən həlak olub şəhadətə qovuşmuşlar. Hətta xəstəxanalara və apteklərə də hücum edirlər, qida məhsullarının saxlandığı anbarları, mağazaları qarət edirlər. Ramallahda və bəzi şəhərlərdə əhali öz evlərindən bayıra çıxmağa cürət etmir. Qadınlar, uşaqlar, didərgin düşmüş bu ailələr Allah bilir ki, hansı müsibət və çətinlikdə yaşayırlar. Bu şəhərlərin bəzilərində suyu və elektrik enerjisini kəsiblər. Həyasızlıqları elə bir həddə çatıb ki, Ramallah şəhərində muxtar hökumət başçısının iqamətgahına hücum edib oranı da tutmuşlar; yəni özlərinin rəsmən tanıdıqları, müqavilə bağladıqları hökumətin iqamətgahını.³⁵³

Bütün azadfikirli insanların İsrailin 2002-ci ildəki cinayətlərinə etirazı

Sionistlərdən çəkindiklərinə görə onların əleyhinə bir söz demək istəməyən siyasətçilər də bu gün açıq şəkildə etiraz edirlər. Müsəlman xalqlar hər yerdə qəzəblənib coşmuşlar. Əgər hökumətlər müsəlman və ərəb xalqların önünü kəsməsəydi, o zaman bir milyard müsəlmanın nə edəcəyinə baxardılar! Məsələ burasındadır ki, qaniçənliyin, vəhşiliyin, yırtıcılığın və bütün bəşəri meyarlara, insan haqlarına və bəşəri dəyərlərə etinasızlığın simvolu olan sionist hərbçilər bir tərəfdə, qəhrəmancasına və məzlumcasına müqavimətin somvolu olan məzlum Fələstin xalqı da digər tərəfdə qarşı-qarşıya dayanmışlar. Mən dünyanın vicdanını mühakiməyə dəvət edirəm. Siyasi təhlil, çıxış yolu və tövsiyə kimi deyilən bütün sözlər bu reallıq qarşısında əfsanə və xəyaldır. Reallıq budur ki, bir xalq öz evində təhqir olunur, tutulur, öldürülür, övladı alınır, canının, malının və evinin təhlükəsizliyi həmin torpaqları işğal edənlər tərəfindən təhdid olunur. İndi dünya vicdanı hökm etsin: Burada haqlı kimdir və insanların vəzifəsi nədir? Bizim başqa heç bir şeyə ehtiyacımız yoxdur. Bu reallığı göz önünə qoyub hansı hadisənin baş verməkdə olduğuna baxsınlar. Əlli dörd il öncə sionistlər Fələstinə girəndə dünya onların törətdiyi faciələrdən xəbər tuta bilmədi. Amma bu gün dünya görür. Düzdür, kameralar həqiqəti tam göstərməyə qadir deyillər, yalnız bir hissəsini göstərirlər.³⁵⁴

Kilsəyə hücum

Kilsələrə hücum etmişlər. Yaxşı, dünya məsihiləri ən azı, ötən günlərdə dini ayinini icra edərkən öldürülən məsihi keşişini müdafiə etsinlər. O, Beytülləhmdə sionistlərin kilsəyə hücumu zamanı və kilsəyə sığınmış insanların gözü önündə can verdi. Burada məsələ İslam məsələsi deyil, insaniyyət məsələsidir. Burada mühakimə meyarı insan olmaqdır, insani dəyərləri anlamaqdır. Yaxşı, bu da həqiqət. Düzdür, Avropada və digər yerlərdə bəzi dövlətlər mövqe bildirmişlər. Bu mövqe zəif olsa da, hər halda, İsrailə qarşı yüngül qaşqabaq sayılır.³⁵⁵

Əqsa məscidinə təhqir

Müsəlmanların qibləsi olmuş Əqsa məscidini təhdid etdilər. İllər öncə bir dəfə onu odladılar. Sonra da orada guya qazıntı işləri apardılar. Qanunsuz işlər görür və müsəlmanların qibləsi olan Əqsa məscidini ümumiyyətlə, İslam formasından çıxarmaq istəyirlər.³⁵⁶

Əl-Xəlildə namazqılan insanların qırğını və beynəlxalq təşkilatların sükutu

Sionist düşmənin şərafətli İbrahim hərəminə hücumu faciəsi o qədər böyük və dərdlidir ki, barəsində bir neçə cümlə ilə layiqincə danışmaq olmaz. Bizim fikrimizcə, işğalçı dövlət bu faciəyə görə birbaşa məsuliyyət daşıyır. İşğalçı dövlətin himayədarları da bu hadisə üçün məsuliyyət daşıyırlar. İşğalçı dövlətin himayədarlarının başında duran ABŞ uzun illər boyu həmişə və hər yerdə sionistləri müdafiə etmişdir; harada sionsitlər üçün problem yaranmışsa, ABŞ cəld sinəsini sipər etmişdir... İsrailin digər müttəfiq və yardımçıları da məsuliyyət daşıyırlar. Bu hadisəni layiqincə işıqlandırmayan dünya mediası da məsuliyyət daşıyır. İnsan hüquqları təşkilatları, xüsusən də Birləşmiş Millətlər Təşkilatının İnsan Hüquqları Komitəsi məsuliyyət daşıyır.

Dünyada müxtəlif adlarla fəaliyyət göstərən kiçik və böyük hüquq təşkilatları pusqu qurublar ki, ABŞ-la yaxşı münasibəti olmayan bir ölkədə bir problem yaransın və tez "insan hüquqları pozuldu" - deyə şeypurlarını üfürsünlər. Onlar indi nə üçün səslərini batırıblar?! Xəbis işğalçı dövlət və insanlıq düşməni olan sionistlər yüzlərlə fələstinlini səcdə və oruc halında qana boyayır, onlarla insanı öldürür, yüzlərlə insanı yaralayır, sonra da ürəyi yanmış dağlı və qəzəbli xalq küçədə yumruqlarını düyünləyəndə israilli əsgərlər bir-bir xalqın övladlarını hədəf seçir və məhv edirlər. Lakin insan hüquqlarının keçikçisi olan təşkilatlar səslərini batırıb heç bir söz demirlər. Maksimum deyilir ki, filan təşkilat qınayır. "Qınayır" nə deməkdir?! Bu bir kəlmə söz fələstinlilərin hansı işinə yarayır?! İnsan hüquqlarının iddiaçısı olan təşkilatlar əgər səmimidirlərsə, hamılıqla ayağa qalxmalı, dünyada fəryad qoparmalı, İsrail dövlətini blokadaya salmalı, İsrailin himayədarlarına ultumatım verib təhdid etməli idilər ki, bu qaniçən, fasiq və cinayətkar dövlətə kömək etməyə haqqınız yoxdur. Amma bu işlərin heç biri görülmədi. Ərəb dövlətləri də təəssüf ki, güzəştə getdilər. Müzakirələri nəinki tam dayandırmadılar, heç ümumi matəm də elan etmədilər. Həqiqətən, çox səhlənkarlıq və təqsirkarlıq etdilər.³⁵⁷

...Sionistlərin işğal olunmuş əl-Xəlil şəhərində namaz qılanlara qarşı qəddar hücumu, onlarla insan öldürüb, yüzlərlə insanı yaralaması özlərinin spesifik qəddarlıqlarına və çirkinliklərinə xas cinayətlərdəndir. Bu dərdli faciə onların digər kütləvi qırğınlarını xatırladır; bu fərqlə ki, bu gün bu böyük cinayət bütün dünya xalqlarının gözü qarşısında baş verir. Fələstinlilərin evlərində başlarına gətirilənlərə etinasız yanaşanlar bu hadisədən oyanacaqlarmı?! İşğalçı düşmənlə yalançı sülh iddiaçıları öz səhvlərini dərk edəcəklərmi?! İllərdir Fələstində bir xalqın ən böyük hüquq pozuntusunu görməzliyə vurub insan hüquqlarının müdafiəçiliyini iddia edən təşkilatlar və dövlətlər bu dəfə özlərinin xəcalətli sükutuna son verəcək və keçmişdəki günahlarını etiraf edəcəklərmi?! ABŞ dövləti Fələstin günahsızlarının qanına şərik olduğunu qəbul edəcəkmi?! Çünki o, sionizm dövlətini həmişə və qeyd-şərtsiz müdafiə etmişdir.³⁵⁸

Beynəlxalq təşkilatların səhlənkarlığı

İbrahim hərəmində törədilən qanlı faciədə İsrail sərt qınanmalı və cəzalandırılmalı idi. Bu işləri Birləşmiş Millətlər Təşkilatı görməli idi, amma görmədi. Təhlükəsizlik Şurası da öz vəzifəsinə əsla əməl etmədi.

Səbəbi nədə görürük? Böyük güclərin, ilk növbədə ABŞ-ın Təhlükəsizlik Şurasına və Baş katibin özünə təsirində. Bu, İslam Respublikası quruluşunun və İran xalqının fikridir. Bizim heç kimlə xüsusi düşmənliyimiz yoxdur. Biz beynəlxalq rəsmilərə vəzifə və mövqelərinə görə hörmət edirik. Birləşmiş Millətlər Təşkilatının qabaqkı Baş katibi dəfələrlə İrana gəldi. O zaman prezident, parlamentin sədri və Xarici işlər nazirliyinin məsul işçiləri ona hörmət etdilər. Əgər Baş katib öz vəzifələrinə əməl etsə, biz ona hörmət edərik. Amma bizim və İran xalqının fikrinə görə, Birləşmiş Millətlər Təşkilatının indiki Baş katibi öz vəzifəsinə əməl etməmişdir. Birləşmiş Millətlər Təşkilatının dırnaqarası İnsan Hüquqları Komitəsinin çirkin şəkildə İslam Respublikasını ittiham etməsi də belədir. Gözlərinin önündə israillilər yüzlərlə namazqılan müsəlmanı qana boyayır, yetmiş nəfərdən artıq insan öldürür, amma onları qınamırlar.³⁵⁹
Fələstin xalqına qarşı zülm və cinayət

Mübarək ramazan ayının bu günlərində Fələstinin oruc əhalisi öz evində işğalçı düşmənin müxtəlif hücumlarına məruz qalır. İşğal olunmuş ərazidə küçələr fələstinli gənclərin qanına boyanıb, zindanlar onlarla dolmuşdur və Qərb dövlətləri - demokratiya və insan hüquqlarının yalançı iddiaçıları nəinki ən kiçik etiraz belə etmir, hətta bəzən təcavüzkar işğalçını dəstəkləyir və həvəsləndirirlər də.

Çox əhəmiyyətli və dəhşətli olan son hadisə - Sovet yəhudilərinin Fələstinə kütləvi və ardıcıl köçürülməsi Fələstin məsələsində yeni cəhətlər ortaya çıxarır, ABŞ və SSRİ-nin bu məsələyə dair gizli razılaşmaları üzərindən pərdə götürür.³⁶⁰
Fələstinlilərin öz evlərində təhqir olunması

Bu gün məzlum Fələstin xalqı heç bir cinayət törətmədən, yalnız öz evində və vətənində azad yaşamaq və təhqir olunmamaq istədiyinə görə terrorçu adlandırılır. Bu, böyük tarixi zülmlərdən biridir. Fələstin xalqı öz evində işğalçıları görür, onun həyatı talanmış, evi alınmış, sərvət qaynaqları düşmənlərinin ixtiyarına keçmişdir. Bunlardan əlavə, onu öz evində, şəhərində və yurdunda təhqir edirlər. Fələstində müsəlman gənc cümə namazına gedəndə onu başdan-ayağa yoxlayırlar, təhqir edirlər, cümə namazına getməyə qoymurlar. Küçədə müsəlman bir gəncdən, kişidən və qadından azca şübhələnsələr, dərhal təhqir edirlər. Əgər bir söz desələr, yaxud nədənsə qəzəblənsələr, heç bir maneəsiz döyüş texnikasını küçələrə çıxarır və tankla evlərini dağıdırlar.³⁶¹

Qəzzə cinayətlərində sionistlərin rəhmsizliyi

Böyük İslam ümməti! Əziz İran xalqı!

Bu günlərdə baş verən qanlı Qəzzə hadisələri elə faciəli və dərdlidir ki, ondan irəli gələn ağır qəmi dil və qələmlə bəyan etmək mümkün deyil. Günahsız uşaqlar, məzlum qadın və kişilər aylarla tam blokadadan sonra indi öz elvərində rəhmsiz və daşürəkli sionistlər tərəfindən qana boyanırlar. Növrəs qönçələr ata-analarının gözü qarşısında, ata və analar da məsum uşaqları qarşısında işğalçı cəlladların ədavət alovunda yanırlar. Mədəniyyət və humanizm iddiaçıları çox həyasız şəkildə, soyuqqanlılıqla və laqeydliklə bu dəhşətli insan faciəsinə tamaşa edirlər. Hətta bəziləri utanmadan buna razılıq bildirirlər. İslam dünyasının bu misilsiz təcavüz qarşısında sükutu əsla qəbuledilməzdir.

...Mən Qəzzə əhalisini, məzlum və müqavimətli kişi və qadınları, məsum körpələri və ləçək-ləçək olmuş qönçələri salamlayır, onlara Allahdan dözüm, qurtuluş və qələbə arzulayıram.³⁶²

"Biz Allahınıq və Ona tərəf qayıdacağıq!"³⁶³

Sionizm rejiminin Qəzzədə dəhşətli cinayəti və yüzlərlə məzlum kişinin, qadının və uşağın qətliam edilməsi sionist canavarların qaniçən simasını son illərin hiylə pərdəsi arxasından yenidən göstərdi və bu hərbi kafirin İslam dünyasının qəlbindəki təhlükəsini qafil və biganə insanların yadına saldı...

Cinayətkar Buş hökuməti öz mənfur hökmranlığının son günlərində bu böyük cinayətdə əlbir olmaqla ABŞ rejimini əvvəlkindən daha üzüqara etdi və müharibə cinayətkarı kimi cinayət qovluğunu daha da ağırlaşdırdı. Avropa dövlətləri laqeydliklə və bəlkə də bu böyük faciəyə razılıqla insan hüquqlarını müdafiə iddialarının yalan olduğunu bir daha sübut etdilər, İslam və müsəlmanlarla düşmən cəbhədə yer aldıqlarını göstərdilər. Mənim ərəb dünyasının alim və ruhanilərinə, əl-Əzhərin başçılarına sualım budur ki, İslam və müsəlmanlar üçün təhlükə hiss etmənizin vaxtı çatmayıbmı?! Hələ zamanı çatmayıbmı pis işlərdən çəkindirməkdən ibarət olan vacib əmələ və zalım rəhbər yanında haqq sözü demək vəzifəsinə əməl edəsiniz?!

Hərbi kafirlərin müsəlmanları əzmək üçün ümmətin münafiqləri ilə əlbir olmasına dair Qəzzə və Fələstində baş verənlərdən daha aydın bir nümunə lazımdır ki, siz məsuliyyət hiss edəsiniz?!

Mənim İslam, xüsusən də ərəb dünyasının media qurumlarına, ziyalılarına sualım budur ki, nə vaxta qədər özünüzün media və ziyalılıq məsuliyyətinizə laqeyd qalacaqsınız?! Qərbin rüsvay olmuş insan hüquqları təşkilatlarının və Birləşmiş Millətlər Təşkilatının dırnaqarası Təhlükəsizlik Şurasının bundan da artıq rüsvay olmaları mümkündürmü?!

Bütün Fələstin mücahidləri və İslam dünyasının bütün möminləri hər bir mümkün yolla müdafiəsiz Qəzzə qadınlarını, uşaqlarını və əhalisini müdafiə etməyə borcludurlar. Bu hüquqi və müqəddəs müdafiədə kim öldürülsə, şəhiddir və ümidvarıq ki, qiyamətə Allah rəsulunun yanında, Bədr və Ühüd şəhidləri sırasında gəlsin.

İslam Konfransı Təşkilatı bu həssas şəraitdə özünün tarixi vəzifəsinə əməl etməli, sionizm rejimi qarşısında çəkinmə və təsirlənmələrdən uzaq olan vahid cəbhə yaratmalıdır. Sionizm rejimi müsəlman dövlətlər tərəfindən cəzalandırılmalıdır. İşğalçı rejimin başçıları bu cinayətə və həmçinin uzunmüddətli blokadaya görə şəxsən mühakimə edilməli və cəzalandırılmalıdırlar.

Müsəlman xalqlar özlərinin güclü iradələri ilə bu tələbləri həyata keçirə bilərlər. Bu işdə siyasətçilərin, alimlərin və ziyalıların vəzifəsi digərlərindən olduqca ağırdır.

Mən Qəzzə faciəsi münasibəti ilə bazar ertəsi gününü ümumi matəm elan edirəm və ölkə məmurlarını bu qəmli hadisə qarşısında vəzifələrini yerinə yetirməyə çağırıram.

"Zülm edənlər isə hansı dönüşə dönəcəklərini mütləq biləcəklər!³⁶⁴"³⁶⁵

Fələstin cinayətlərinin pərdəarxası

Hadisələrin kökü bundan ibarətdir ki, heç bir insani prinsipə məhəl qoymayan hegemon düşərgə coğrafi və iqtisadi sərvətlə dolu olan Orta Şərq regionunu ələ keçirmək istəyir. Məsələ bundan ibarətdir... Gördünüz ki, otuz üç günlük müharibədə ABŞ-ın Xarici işlər naziri dedi: "Bu, yeni Orta Şərqin doğuş ağrısıdır". Yəni bu hadisədən ABŞ-ın istədiyi Orta Şərqdən ibarət yeni bir məxluq doğulacaq. Əlbəttə, bu pərişan yuxunun açması başlarına gələn idi. Livanda mömin gənclərin cəsurluğu, ayıqlığı, fədakarlığı və cihadı yalnız İsrailə yox, hətta ABŞ-a, onların himayədarlarına və ardıcıllarına da zərbə vurdu. Qəzzə hadisəsi də belədir.³⁶⁶

Qəzzə mühasirəsində Hüsni Mübarəkin günahı

Misir xalqı ölkələrinin başında duran şəxsin İsrailin nümayəndəsi kimi ən çirkin cinayətləri törətdiyini müşahidə edirdiər. Qəzzə blokadasında Hüsni Mübarək İsraillə əməkdaşlıq etməsəydi, İsrail Qəzzəni bu şəkildə təzyiq altında saxlayıb bəlli cinayətləri törədə bilməzdi. Hüsni Mübarək kömək etdi, Qəzzənin Misirə giriş-çıxış yollarını bağladı. Sonra xəbər tutdular ki, Qəzzə əhalisi yeraltı kanal çəkib get-gəl edir. Məzlum Qəzzə əhalisinin bu işi təkrarlamaması üçün otuz metr hündürlüyündə polad divarlar çəkib yerə vurdular və kanalların yolunu bağladılar. Bu işləri Hüsni Mübarək gördü. Bəli, Misir xalqı bunu görür. Odur ki, xalqın qüruru yaralandı. Bunun oxşarı digər ölkələrdə də mövcuddur.³⁶⁷

İyirmi iki günlük müharibədə bu xalqın kişisi, qadını, uşağı İsrailin atəşi ilə yandı, məhv oldu, evləri dağıdıldı, amma yardım karvanlarının bu xalqa kömək etməsinə qoymadılar. Misirin özündən yox, digər ölkələr də Misirdən keçmək istəyirdilər, bizim xalqımız gedib bunlara kömək etmək istəyirdi, amma Hüsni Mübarək qoymadı. Misirə belə bir vəziyyət hakim idi. Bəli, bu, xalqı təngə gətirdi. Misir xalqı Misirin indiki rejiminin İsraili müdafiə etdiyinə, ABŞ-a mütləq itaətinə görə rəzillik, təhqir hiss edirlər. Hərəkətin əsas amili budur. Onlar müsəlman insanlardır.³⁶⁸
Azadlıq karvanına hücum və Qərbin müdafiəsi

Sionizm rejiminin humanist yardım gəmisinə cinayətkar və rəhmsiz hücumu o quldur və xəbis hökumətin öz mənfur həyatının yeddinci onilliyini bürüyən böyük cinayətlər zəncirinin başqa bir halqasıdır. Bu, müsəlmanların onillərdir regionda, xüsusən də məzlum Fələstin torpaqlarında əlbəyaxa olduqları həyasız və rəhmsiz rəftarına bir nümunədir. Bu dəfə bu karvan İslam, yaxud ərəb karvanı deyildi, bütün dünyanın ictimai rəyinin və bəşəri vicdanların nümayəndəsi idi. Bu cinayətkar hücum hamı üçün sübut etməlidir ki, sionizm faşizmin yeni və daha qəddar formasıdır və bu dəfə azadlıq və insan hüquqlarını iddia edən dövlətlər, hamısından da çox Amerika Birləşmiş Ştatları tərəfindən müdafiə olunur və yardım alır.

Bu caniləri siyasi, media, hərbi və iqtisadi cəhətdən himayə edib həmişə törətdikləri faciələrin arxasında dayanan ABŞ, İngiltərə, Fransa və digər Avropa ölkələri ciddi şəkildə cavab verməlidirlər. Bütün dünyada olan vicdanlı şəxslər ciddi şəkildə düşünməlidirlər ki, bu gün bəşəriyyət həssas Orta Şərq regionunda təhlükəli bir amillə üz-üzə qalmışdır. Necə qaniçən, həyasız və dəli bir rejim bu gün işğal olunmuş Fələstin ölkəsinə və onun məzlum xalqına hökm edir! Qəzzədə bir milyon yarım qadının, kişinin və uşağın ərzaq, dərman və həyat blokadası nə deməkdir?! Qəzzədə və qərb sahillərində gənclərin gündəlik qətli, həbsi və işgəncəsi necə başadüşüləndir?!³⁶⁹