Microsoft Word Qebele-Son variant
Yüklə 1,9 Mb. Pdf görüntüsü
|
|
Qarayeva da Qəbələyə dəvət edilir. Alimin forum iştirakçılarının Qəbələ ilə bağlı
təəssüratları bir daha hər bir vətəndaşı əmin edir ki, bölgəyə yolu düşən xarici vətəndaşlar həqiqətən buradan yüksək zövqlə ayrılır. “Qəbələ” qəzetinin səhifələrində oxuculara təqdim olunan “Mərakeşdən dostluq məktubu yaxud Qəbələ qonaqların gözü ilə” məqaləsində professor Minirə Qarayeva yazır : “Mən onlara Şamaxının tarixi, İsmayıllının təbiəti, mis əşyaları ilə məşhurluğu, at ilə çətin keçilən dağlarda indi bu gözəl, rahat yolların ümummilli liderimiz Heydər Əliyevin təşəbbüsü ilə salındığını izah edirdim... İsmayıllıdan Qəbələyə 40 km-dir. Qəbələ yolu başladıqca hər tərəfi saran o təbii gözəllik- meşələr, meşələrin içərisindəki istirahət yerləri qonaqları valeh edirdi. Çoxlu suallar verirdilər. Mən isə Qəbələyə vurğun bir qəbələli alim və ən əsası da ingilis dili mütəxəssisi kimi suallara cavab verməkdə acizlik çəkmir, ta qədim dövrdən, 900 il öncədən başlayaraq Qəbələnin tarixi haqqında onlara məlumat verirdim. Nəhayət, Qəbələ rayonuna çatdıq. Yüksək səviyyədə qarşılanma mərasimindən sonra rayonun mərkəzində müasir tipli yeni tikilmiş mehmanxanada yarım saat istirahət etdik. Qonaqlar “Xanlar” istirahət mərkəzinə dəvət olundular. Onu da qeyd edim ki, Qəbələdə bir günlük istirahət üçün əvvəlcədən gözəl bir proqram hazırlanmış və Bakıda ikən bütün qonaqlara təqdim edilmişdi. Qəbələni elə bil qucaqlayaraq qolları arasında saxlayan Dəmiraparanla Qaraçayın başlanğıc qovşağında yerləşən “Xanlar” istirahət mərkəzinin füsunkar təbiəti xarici qonaqları valeh etmişdi. Ərəb jurnalisti olan bir qız dedi ki, “mən 10 il əvvəl bu yerləri, bu təbiəti yuxumda görmüşəm. Ancaq bu on ildə mən çox ölkələrdə olmuşam, çox gözəl mənzərələrin şahidi olmuşam, ancaq yuxumda gördüyüm yerə indi rast gəldim. And içirəm Allaha ki, 10 il əvvəl yuxumda gördüyüm yer buradır, məhz buradır. Mən nə qədər xoşbəxtəm, bu yeri görmək mənə nəsib oldu”. Adət-ənənələrimiz, “Xanlar” restoranındakı ləziz xörəklər və xidmət qonaqların çox xoşlarına gəlirdi. Tez-tez öz təəssüratlarını bildirirdilər, mən də öz növbəmdə onların ingiliscə dediklərini Azərbaycan dilində ev sahiblərinə çatdırırdım. Bax, beləcə hamı bir- biri ilə dialoq qururdu. Qadınlar qısa müddətdə dostlaşdılar və bir-biri ilə ortaq dil tapdılar. Məhz ölkənin birinci xanımı Mehriban xanımın da belə konfranslardan istəyi, arzusu bu dialoqlardır. Tacikistan Respublikası Sahibkar Qadınlar Assosiasiyasının sədri, tarix elmləri namizədi, dosent Saboxat Raximovna Raximzoda görkəmli siyasi xadim, ümummilli liderimiz Heydər Əliyev ilə 1983-cü ildə Moskvada necə görüşdüyü barədə çox maraqlı bir epizod danışdı... Başqa bir türk həmkarım professor Ruveyde Akbay Qəbələdə çıxış edərək onlara göstərdikləri qonaqpərvərliyə görə rayon rəhbərliyinə, ləziz və dadlı yeməklərinə və qüsursuz xidmətlərinə görə “Xanlar” istirahət mərkəzinin bütün kollektivinə qonaqlar adından və şəxsən öz adından təşəkkürünü bildirdi. Qonaq qeyd etdi ki, belə konfransların keçirilməsi, mədəniyyətlərarası dialoqun qurulmasında sizin prezidentin xanımının əməyi çox böyükdür. O, çox gözəldir və eyni zamanda fövqəladə bacarıqlı ictimaiyyətçidir və bütün səyini dünya qadınlarını birgə dialoqa cəlb etməyə çalışır. Çünki analar bir olsa, gənc nəslin təhsili və gələcəyi daha etibarlı olar. Sonra qonaqlar ulu öndərimiz Heydər Əliyev adına istirahət parkında xalq musiqisini dinlədilər və xalq oyunlarına tamaşa etdilər. Qəbələ Rayon Tarix-Diyarşünaslıq Muzeyində və “Heydər Əliyev muzeyi”ndə oldular. Tarixi bir şəxsiyyət kimi ulu öndərin həyat və fəaliyyətini əks etdirən bu muzey, zənginliyi və müasirliyi ilə qonaqlara böyük təsir bağışladı. Tarix-Diyarşünaslıq muzeyindəki eksponatlara baxdıqca Misir və Mərakeşdən gələn qonaqlar mis qabları, təndiri, kəlayağı və samovarı, cəhrəni və digər məişət əşyalarını gördükcə tarixi köklərimizin bir-birinə nə qədər yaxın olduğunu söyləyirdilər. Görkəmli şəxsiyyətlərin arxivinin muzeydə qorunub saxlanmasına da yüksək qiymət verirdilər. Çox ölkələrdə sevilərək oxunan “Diplomatica” jurnalının redaktoru ərəb naşir Abdelati Habek tarix muzeyini gəzərkən maraqlı eksponatlar barədə suallar verir və dəftərçəsinə qeydlər edir, Qəbələ xalçalarının naxışlarına heyranlıqla baxırdı. Qəbələnin təbiətinə, insanlarına və çox adətlərimizin bir-birinə oxşarlığını dilə gətirərək, qonaq öz ürək sözlərini söyləyirdi. Bir qəbələli alim kimi muzeydə mənə ayrılan guşədə şəklimi, dərs kitablarımı və elmi əsərlərimi görüb onlarla foto çəkdirməyimi xahiş etdilər... Həmin səfərdən sonra elektron ünvanıma gələn çoxlu sayda məktublardan yalnız Qəbələyə aid məqamları sizə oxumaq istəyirəm. “Əzizim Minirə... Mən konfransdan üç gün sonra Kasablankaya gəlmişəm... Mən həqiqətən Azəri xalqını sevdim. Mərakeş ilə Azərbaycan arasında coğrafi məsafə olmasına baxmayaraq, mən doğrudan da özümü Bakıda və hətta daha çox Qəbələdə öz evimizdəki kimi hiss etdim. Yadımdadır, Qəbələ restoranında gənc bir Azəri qadın ilə Ramazan bayramı və toy mərasimində Azəri adət-ənənələrindən danışdıq... Azəri xalqının necə alicənab və səmimi olduqlarının şahidi oldum. Siz qonağı necə qarşılamaq və hörmət etmək lazım olduğunu bilirsiniz... Kimi görürəmsə, hər kəsə Qəbələ haqqında danışırdım. Rayon o qədər gözəldir ki,...Allah bu gözəlliyi xüsusi olaraq yalnız Qəbələ camaatına bağışlayıb. Mən Qəbələdə gördüyüm bütün adamlara və Sizə qonaqpərvərliyiniz üçün öz təşəkkürümü bildirmək istərdim. Biz ərəblər, HATİMİ alicənablığı və qonaqpərvərliyi haqqında danışırıq, indi mən lüğətimizə Azəri qonaqpərvərliyini də əlavə edirəm... Hmimou Kaoutar.” Xaricdən aldığım digər məktublarda da Qəbələdən yazılırdı. Torpağımın dildən-dilə düşməsi təbii ki, məndə də qürur doğurur, inkişafı və gözəlliyi ilə diqqət çəkən Qəbələnin əks-sədası beynəlxalq aləmə yayıldıqca bu millətin övladı olduğum üçün özümü xoşbəxt sayıram”. (“Qəbələ” qəzeti, 15 sentyabr, 2008-ci il). Bura gələn turistlər arasında belə mötəbər qonaqlar çox olur. Respublikamıza işgüzar səfər edən xarici ölkə nümayəndələri, iş adamları yolunu buradan salır, bura haqqında ürək dolusu danışmaqla öz zəngin təəssüratlarında yurdumuzun bu əsrarəngiz parçasından bəhs edirlər... Yüklə 1,9 Mb. Dostları ilə paylaş:
|