Mühazirə - 11
Ə. Mirzəzadə
Azərbaycan XVIII əsrin birinci yarısında.
Plan:
1. Əsrin əvvəlində baş vermiş üsyanlar (səbəb və nəticələri),
2. I Pyotrun Xəzəryanı bölgələrə yürüşü,
3. Səfəvi imperiyası torpaqlarının bölüşdürülməsi uğrunda mübarizə,
4. Nadir xanın qələbələri və hakimiyyəti ələ keçirməsi, islahatları,
5. Nadir şah imperiyasının süqutunun səbəb və nəticələri
Ədəbiyyat:
1.Azərbaycan tarixi. 7 cilddə. IV c. Bakı, 2007.
2. Əsədov F. Nadir Şah Əfşar. Bakı, 2011
3. Əsədov F. Azərbaycan diplomatları XVIII əsrdə. Bakı, 1983.
4. Tahirzadə Ə. Nadir Şah Əfşar (tərcümeyi hal oçerki). Bakı, 2005.
5. Süleymanov M. Nadir Şah. Tehran, 2010.
XVII əsrin sonu – XVIII əsrin başlanğıcında Səfəvi dövləti dərin iqtisadi və siyasi böhran
keçirirdi. Dövriyyədə gümüş pul çatışmamazlığı yarandı, dövlət xəzinəsi tamamilə boşalmışdı.
Ərdəbil məqbərəsindəki əşyaları (qızıl, gümüş və mis) əridib pul kimi istifadə edirdilər Şah
Sultan Hüseynin(1694-1722) gördüyü tədbirlər maliyyə böhranının qarşısını ala bilmədi.
Mərkəzi hakimiyyətin zəifləməsindən istifadə edən iri feodallar müstəqilliyə can atırdılar.
Ölkədə şah hakimiyyətinə və feodal zülmünə qarşı xalq hərəkatı genişləndi.
