A n a r əsərlər I hekayələr, povestlər
Yüklə 3,29 Mb. Pdf görüntüsü
|
- Bu səhifədəki naviqasiya:
- MARAQLI TƏDQİQAT
- DİVANİ-ÇİNAR
- BİZİM MÜSAHİBƏ
|
BİR STƏKAN SU
Bir gün kəndə şəhərdən böyüklər gəlmişdi. Camaatı yığıb bir yaxşı iclas elədilər. Pambıqçı danışdı. Çoban danışdı. Meşəbəyi danışdı. Mexanizator danışdı. Zootexnik danışdı. Şəhərdən gələnlərdən biri dedi ki, bəs heç gözümə cuvarların nümayəndəsi dəymir. Yəni bu boyda kəndin bir qabaqcıl cuvarı yoxdur. Əl-ayağa düşdülər, dedilər necə yoxdur, heç elə iş olar? Əlbəttə var, harda olsa bu saat tapıb gətirərik. Getdilər suyu qurumuş dəyirmanın yanına, gördülər su çıxmaz arxın cuvarı Cəfər saman altdan su buraxır. Gətirdilər Cuvar Cəfəri birbaş iclasa. Böyüklər — Ay sağ ol, Cuvar yoldaş —dedilər, hamı danışdı, dur sən də bir-iki kəlmə de! Cuvar Cəfəri itələdilər kürsüyə sarı. Cuvar Cəfər lap özünü itirmişdi. Nə desin, nədən danışsın. Kişi elə karıxdı, elə çaşdı ki, vurdu kürsünün qırağındakı stəkanı saldı yerə, stəkan sındı, su dağıldı. Cuvar Cəfər lap özünü itirib dili dolaşa-dolaşa: –Eybi yoxdur, — dedi, — su aydınlıqdır. Bunu deyib düşdü aşağı, getdi oturdu bir bucaqda. İclasın axırında şəhərdən gələn böyüklərdən biri yaxşı bir nitq söylədi. Dedi ki, mən bir şeyi sizə xatırlatmaq istəyirəm. Suvarma işlərinə xüsusi diqqət yetirmək lazımdır. Qabaqcıl cuvarların təcrübəsini dərindən öyrənmək lazımdır. Burada məndən əvvəl çıxış edən kəndinizin fəxri, adı dillərdə əzbər məşhur Cuvar Cəfər yaxşı bir söz dedi. Dedi ki, su aydınlıqdır. Mən bu sözə yüz faiz şərikəm, suyun qədrini bilin. Cuvar Cəfərin qədrini bilin. Su bizim gələcək qələbələrimizin rəhnidir. Su aydınlıqdır. Su aydınlıq gecələrin ulduzudur. Cuvar Cəfərin ulduzu belə parladı. Göndərdilər Cuvar Cəfəri Özbəkistana təcrübə mübadiləsinə. Bəstəkar Nadir 488 Nikbin şair Bəkir Bədbinin sözlərinə bir mahnı yazdı, müğənni Süsən Sünbül oxudu, aləmə yaydı.
Bir gün Cuvar Cəfəri çağırdılar şəhərə. Samur-Dəvəçi Kanalının 22 illiyi münasibətilə böyük məclis çağrılmışdı. Qəflətən sədr elan etdi ki, söz Cuvar Cəfərə verilir. Cuvar Cəfər lap mat-məəttəl qaldı. Nə bileydi ki, danışacaq. Amma daha geç idi. Hamı onu gözləyirdi, Cuvar Cəfər qalxdı kürsüyə, bir az ora-bura döyükdü, gözü sataşdı kürsünün qırağındakı su stəkanına, boğazını arıtladı və dedi. –Bax, məsələn, götürək bu su stəkanını. Yaxşı deyiblər ki, su girdi qaba oldu içməli. İndi bax, məsələn, mən bu stəkandakı suyu götürüb içə bilərəm. Amma, məsələn, bu su burda üç gün qalsa, içə bilmərəm. Niyə? Çünki su bir yerdə qalanda iyiyər. Elə ona görə də kanal çəkirlər ki, su bir yerdə qalmasın, daima axsın, çuxuru tapsın, yaşasın bu kanalı çəkən əməkçi yoldaşlar! Cuvar Cəfərə xeyli əl çaldılar. Elə oradan çıxarıb basdılar onu qara "Volqa"ya, apardılar mitinqə. Mitinq köhnə hamamlara təzə tas qoyulması 489 münasibətilə çağırılmışdı. Cuvar Cəfəri maşından çıxarıb bir baş kürsüyə itələdilər. Cuvar Cəfər: –Götürək məsələn bu bir stəkan suyu, — dedi, — Niqalayski vremədə xozeynlər bu suyun üstündə zəhmətkeşləri çox incidiblər. Onları suya aparıb susuz kətiriblər. Doğrudur, bəzi vaxt gözdən pərdə asmaq üçün hamam-zad da tikiblər. Amma hamam suyuyla çamaatı dost tuta bilməyiblər. Eh! Danışmaqla qurtarmaq olmur. Çox söz hamamda yada düşər. Mən bu şanlı gündə köhnə hamamlara təzə taslar qoyulması münasibətilə sizin hamınızı təbrik edirəm. Mitinqdən sonra Cuvar Cəfərdən xahiş etdilər ki, televizorla çıxış etsin. Cuvar Cəfər: –Elərəm, — dedi, — amma bircə şərtlə, qabağıma bir stəkan su qoyun. Bir saatdan sonra Cuvar Cəfər: –Hörmətli televiziya tamaşaçıları, — dedi, — götürək, məsələn, bu bir stəkan suyu. Bundan sonra bir həftə Cuvar Cəfər müxtəlif iclaslarda çıxış elədi. Pioner balalarla görüşdə dedi ki, əziz balalar, unutmayın ki, yol böyüyündür, su kiçiyin. Baytarların müşavirəsində su görəndə susamaqdan, at görəndə axsamaqdan danışdı. Astronomların elmi konfransında suyun duru, ayın arı olması haqda mülahizələr irəli sürdü. Tərcümə problemlərinin müzakirəsində müəlliflərin yadına saldı ki, su gərək quyunun dibindən çıxsın, quyuya su tökməklə sulu olmaz. Qəzet müxbirilə müsahibə zamanı, müsbət qəhrəman və müsbət ideal haqqında öz fikrini belə ifadə etdi: suyun lal axanı, adamın yerə baxanı. Bir gün lap böyük iclas çağırdılar və sözü Cuvar Cəfərə verdilər. Cuvar Cəfərin daha kürsü görəndə karıxan vaxtı çoxdan keçmişdi. Qazı-qazı kürsüyə tərəf addımladı, qalxdı, bir müddət təmkinlə salonu süzdü, boğazını arıtladı və dedi:
490 –Məsələn, götürək bu bir stəkan... — birdən Cuvar Cəfərin boğazı qurudu, rəngi sapsarı saraldı; xüsusi hörmət əlaməti olaraq Cuvar Cəfərçün bu səfər stəkanına su yox, pürrəng çay tökmüşdülər. Cuvar Cəfər dili dolaşa-dolaşa: –Su... çay... göl... dəniz... batdım... — deyə adda-budda kəkələdi. Çoxdan bəri ona həsəd aparan Çayçı Cəmil 13-cü sırada oturub rəqibinin çətinə düşdüyünü ləzzətlə seyr edirdi. Axırda özünü saxlaya bilməyib yerindən qışqırdı: –Hə, nə oldu, aşna? Çayda balıq yan gedər? O gündən Cuvar Cəfərin ulduzu batdı, Çayçı Cəmilin ulduzu parladı.
Həfçi Məlik Xoca Zığzığ 491
MARAQLI TƏDQİQAT
Gənc tədqiqatçı Səf Səfəyev neçə ildir ki, "Bir naməlum şair haqda" adlı maraqlı mövzu üzərində çiddi tədqiqat işi aparır. Bu günlərdə o dissertasiyasını tamamlamışdır. Aşağıda həmin dissertasiyadan bir parçanı hörmətli oxucularımıza təqdim edirik:
"Tədqiqatımızın əsas mövzusuna keçməzdən əvvəl mən faydalı məsləhətləri, qayğıkeş münasibəti, dərin zəkası, həssas qəlbi, həlim xasiyyəti, mehriban davranışı, xoş niyyəti, iti qələmiylə mənə yaxından kömək etmiş hörmətli və məşhur alimlərimizdən A.-ya, B.-yə, V.-yə, Q.-yə, D.-yə... (Cəmisi otuz iki hərf — Redaksiyadan) öz səmimi və dərin təşəkkürümü bildirmək istəyirəm. Habelə bu işin yazılmasında yaxından iştirak etmiş şəxslərə — Mövzunu tapan Tələt Tələtova, mənbələri araşdıran Müdhət Müdhətova, mənbələri müəyyənləşdirən Əhəd Əhədova, dəqiqləşdirən Əsəd Əsədova, əlyazmaları oxuyan Qüdrət Qüdrətova, əlyazmaları tərcümə edən Hidayət Hidayətova, sözləri, adları və istilahları izah edən Fikrət Fikrətova, bu vasitəylə əldə alınan materialı sistemləşdirən Əhməd Əhmədova, ümumiləşdirən Məmməd Məmmədova, yekunlaşdıran Nemət Nemətova, dissertasiyanı karandaşla yazan Şövkət Şövkətovaya, mürəkkəb qələmlə yazan İzzət İzzətovaya, makinada yazan İsmət İsmətovaya və nəhayət. cildləyən Karapet Aristakesova öz dərin minnətdarlığımı bildirirəm. Mənim elmi əsərim naməlum əsrdə naməlum bir şəhərdə yaşayan naməlum bir şairə həsr olunmuşdur. Bəzi fərziyyələrə görə bu şairin adı təxminən Çinar olmuşdur. Biz onu şərti olaraq Çinar Girdimani-Beyləqani adlandırırıq. Çünki heç bir şübhə ola bilməz ki, əgər o, Girdimanda dünyaya gəlmişsə, tam
492 bir hüquqla Girdimani, Beyləqanda doğulmuşsa eyni haqla Beyləqani təxəllüsünü daşıya bilərdi. Çox təəssüf ki, uzun illərin araşdırmaları sayəsində Çinar Girdimani-Beyləqaninin şəxsiyyəti və tərcümeyi-halı haqqında heç bir məlumata rast gəlmədik. Ancaq tam bir cəsarətlə deyə bilərik ki, o, öz dövrünün gözüaçıq, savadlı, ensiklopedik biliklərə malik olan, daima istismar edilən xalqın tərəfini saxlayan məğrur və məşhur bir sənətkarı olmuşdur. Təəssüf ki, əlimizdə olan bir neçə şerin Çinar Girdimani-Beyləqaniyə aid olub-olmadığını qəti təsdiq etməyə əsaslı dəlillərimiz yoxdur. Ancaq heç bir şübhə ola bilməz ki, böyük humanist və realist sənətkar kimi Çinar Girdimani-Beyləqani ölməz şer bülbülləri sırasında əbədi, möhtəşəm və özünəməxsus bir yer tutur. Bəzi alimlər göstərirlər ki, "Gülün qədrini bül-bül bilər" aforizmini ədəbiyyat tariximizdə ilk dəfə məhz Çinar Girdimani- Beyləqani işlətmişdir. Bəzi tədqiqatçılar daha irəli gedərək, hətta "Gül solanda, bülbül ağlar" aforizmini də ona isnad edirlər. Biz bu sahədə daha cəsarətli bir addım ataraq, indiyə qədər müəllifi məlum olmayan bir ifadəni də məhz Çinar Girdimani-Beyləqani qələminin məhsulu saymaq istəyirik. Həmin ifadə belədir: "Gül-güllükdə bitər". Bizcə, bu ifadəni birinci dəfə Çinar Girdimani-Beyləqani işlətmişdir. Bu müddəanı irəli sürdükdə nəyə əsaslanırıq: a) Bu ifadənin müəllifi məlum deyil. Çinar Beyləqani-Girdimaninin bu ifadəni yaradıb-yaratmadığı da məlum deyil. Deməli tam bir qətiyyətlə demək olar ki, bu ifadənin Çinar Girdimani–Beyləqani tərəfindən yaradılmadığını söyləməyə heç bir əsasımız yoxdur və beləliklə bu ifadəni ona aid etməyimizə də heç kəsin etirazı ola bilməz. b) Çinar Girdimani-Beyləqaninin əsərlərində dəfələrlə "gül" "güllük", "bitər" sözlərinə və defisə rast gəlirik. Deməli bu obrazlar, bu dil, ifadə tərzi, təhkiyə onunçün səciyyəvidir. v) Bu fikirdəki dahiyanə sadəlik, dərin hikmət, müşahidə və ümumiləşdirmə qüdrəti məhz püxtələşmiş bir sənətkarın, dünyanın hər üzünü görmüş, geniş həyat
493 müşahidəsinə malik olan bir dühanın qələmindən xəbər verir. Çinar Girdimani-Beyləqaninin neçə il ömür sürdüyü bizə məlum deyil. Deməli güman etmək olar ki, onun uzun, keşməkeşli və zəngin bir həyatı olmuşdur və qoca yaşlarında həyatın hər üzünü görmüş sənətkar müdrik bir kəlam söyləyirsə burada təəccüb doğuracaq bir şey yoxdur. Aşağıda Çinar Girdimani-Beyləqaninin əruz vəzni ilə yazılmış və hələ tapılmamış "Divani-Çinarından" bir qəzəli oxucularımıza təqdim edirik.
Dərdimə, möhnətimə dəvayi-çarə getdi. Ol boyu sərv-rəvan, gözləri cənnət qapısı Bizi cənnətdən edib qoydu avara getdi. Dili-suzanımızı vədə ilə aldadıb Yenə bu dərdi bizə bəxş edib hara getdi. Canı qurban edəriz püstə dəhanına onun Neylə küsdürdük onu, neylədik yara getdi. Niyə zülm etdi bizə cövrü-cəfanı kəsdi Dərd–möhnət işinə verdi bir ara getdi. Ol mah üzlü gözəlin dişləri dürdanə–sədəf Özü xoş oldu qami verdi Çinara getdi. Qeyd: Bu qəzəlin "Divani-Çinardan götürüldüyünü, "Divani-Çinarın" məhz Çinar Girdimani-Beyləqaniyə mənsub olduğunu, habelə belə bir divanın mövcud olub-olmadığını təsdiq edəcək faktlar, təəssüf ki, hələ əlimizdə yoxdur. Bəzi fərziyyələrə görə Çinar Girdimani-Beyləqani qoşma da yazmışdır. Aşağıdakı qoşma, təxminən onunku ola bilərdi.
494 QOŞMA
Yanağın üstündə xal gərək olsun Buxaq ağ yaxşıdır, zülflərin siyah Ləblərin yaqutu al gərək olsun. Gəl çapaq atları Murov dağında Çomərdlik vaxtında, iyid çağında Toy-düyün günündə yar qabağında Parça, ipək, atlaz, şal gərək olsun. Yüz namərd yığılıb çıxsalar üzə Biz laçın nəsliyik, sar neylər bizə Yarın mehman olub gələndə sizə Süfrədə yağ, pendir, bal gərək olsun. Əcəldən istəməm möhlət ya aman Yaxşıya yaxşıyam, yamana yaman. Çinarın qoşması oxunan zaman Şairlərin dili lal gərək olsun.
qoşma janrını yeni boyalarla rövnəqləndirmiş, yeni ifadə vasitələri, təşbihlər, qafiyələrlə zənginləşdirmiş, yeni poetik incilərlə parlada bilmiş, şer gülüstanımıza öz ətri, öz rayihəsi olan tər çiçəklər ərmağan etmişdir. Çinar Girdimani-Beyləqaninin əlimizdə olmayan maraqlı şerlərindən biri də "S. hərfi" adlı şerdir. Bu şer sərbəst vəzndə yazılmışdır. Həmin fakt bir daha sübut edir ki, sərbəst vəznin yenilik olduğunu iddia edənlər yanılırlar, bu forma ədəbiyyatımızda hələ çox qədimdən məlum idi. Çinar Girdimani–Beyləqani hələ neçə yüz, bəlkə də neçə min il bundan qabaq sərbəst vəzndə şer yazaraq nəinki müasir ədəbiyyatın, hətta müasir texnikanın da bir çox nailiyyətlərini
495 uzaqgörənliklə qabaqcadan görə bilmişdir. Fikrimizin həqiqət olduğuna inanmaq üçün şerdəki "telefon" sözünə diqqət eləmək kifayətdir.
Qulaqımda telefonun dəstəyi Titrəyib əsən
bir səs
səsləyir
səni
Qəsdən
pəsdən
Bəs sən?
Qulağımda telefonun dəstəyi Qulağım səsdədir
Qulağım xəstədir
səsdən.
Bəs yoxmu
bir kəs kəssin
əzsin bu səsin səsini səsləyəndə səni sənsizləşərək …Səs. Yenə səs: —Siz? —Sus.
—ssssssss.
və çoxcəhətli bir istedada malik olan sənətkar imiş. Bəzi 496 alimlərin fikrincə, Çinar Girdimani-Beyləqani adlı bir adam ümumiyyətlə yerli-dibli olmayıb. Biz hələlik bu barədə nə "hə", nə də "yox" deməkdən qəti boyun qaçırırıq. Çünki namizədlik dissertasiyamızda bu məsələni həll etməyi qarşımıza məqsəd qoymamışıq. Namizədlik dissertasiyasını müdafiə etdikdən sonra, müəllif tədqiqatını davam etdirmək, doktorluq dissertasiyası yazmaq və Çinar Girdimani-Beyləqaninin mövcud olub-olmaması məsələsini ətraflı işıqlandırmaq fikrindədir. SON SÖZ. Müəllif Çinar Girdimani-Beyləqaninin qəzəllərini yazan qəzəlxan Cümşüd Cümşüdova, qoşmanı qoşmuş aşıq Mürşüd Mürşüdova, "S. hərfi" şerini işləmiş kibernetik maşın "S. S.-Səksən Səkkizə" səmimi qəlbdən təşəkkürünü bildirir".
497 KƏLAM QONAĞLIĞI
Şanlı məktub! Əzizim Baldadaş! Bazar ertəsi, yerin məlim, zavmaq Baloğlan, bizi fisincan plova çağırmışdı. Sağlığına yedik içdik, day kef boğazdan. Araq vurdu bazarkom Atobbanın başına, dedi, bəs siz öləsiz, bütün bu əhli-məclis kamal-ədəblə dəvət olunur sabah bizim xanə–xaraba, kababa... Xas günü Atobbagildə, yerin məlim, iç-bağırsağı, lüləni, tikəni, ciyəri, böyrəyi, təzəcə qurtarıb keçmişdik ağ ətə ki, tovaroved Xosməmməd dedi, sabah gərək bizə buyurasız düşbərə qutaba. Çərşənbə axşamı yerin məlim, düşbərə qutabı bədənə vurub bəh-bəh deyəndə, zavsklad Ənnağı qalxdı ki, bəs sabah mənim qonağımsız, Səlyandan yaxşı balıq göndəriblər. Cümə axşamı, yerin məlim, balığın axırına çıxırdıq ki, elə bu dəm zavsex Nağdalı dedi: sabah bozbaşa bizə təşrif gətirməsəz ta qiyamətəcən sizdən inciyərəm. Cümə günü, yerin məlim Nağdalıgildə bozbaş qonaqlığı çox çəkdi. Tamadanın sağlığına badə qaldırıb məclisi xətm eləyirdik ki, Baksovetin saatı 6-nı vurdu, baza müdiri Burcəli dedi, bu saat burdan birbaş gedirik bizə xaş, baş-ayaq, dırnaq, kəllə–paça, xolodes yeməyə. Əsil məqamıdır. Yerin məlim, şənbə günü Burcəligilə getdik xaşa, həftəni vurduq başa. Qaldı bir bazar, bir də müəllim Əhməd Nəzər. Əhməd Nəzəri tanıyırsan da, müəllim babadır. Amma gördü ki, qeyrət vaxtıdır, boğazını arıtlayıb: sabah inşallah bizə qonaqsız —dedi, —sizi dəvət edirəm kələm qonaqlığına. –Kələm qonaqlığı? O nə deyən şeydir? –Kələm qonaqlığı — yəni pervi kələm borşu — po yevropeyski, vtoroe kələm dolması — nasyonalnı, treti də tutma kələm —internasyonalnı. –A, dinmə, bu nədisə ayrı aləmdi! —dedik.
498 Uzun sözün qısası yığışıb səhər gəldik Nəzər müəllimgilə. Nəzər müəllim: –Ay sizi xoş gəlmisiz, –dedi, — səfa gətirmisiz. Qonaq gəlməyən evə həkim gələr. Burcəli töyşüyə-töyşüyə: –Əmbə pilləkənlərin yaman hündürdür, —dedi, — adamın lap kələyi kəsilir. Nəzər: –Eh, ay dost, —dedi, —biz çıxan zirvələrin yanında bu pilləkən nədir ki... Bəli, buyurduq içəri. Nağdalı: –Otağın nə dardır, ay Nəzər, —dedi. Nəzər: –Otağın darlığına nə baxırsan, — dedi, — adamın gərək qəlbi gen olsun. Əyləşdik. Yemək-içməyə keçməzdən qabaq bir məşğuliyyət axtardıq. Atobba:
–Ay Nəzər —dedi — nərdin var? Nəzər:
–Nərdim yoxdur, dərdim var, — dedi. Xosməmməd: –Dərd düşməninin olsun, —dedi. Nəzər:
–Düşmən ocaq başındadır, —dedi. Mat–məəttəl bir–birimizə baxdıq, da kəlmə kəsmədik. Elə bu vaxt Ənnağı durdu ki, bəs məni bağışlayın, gərək ayaqyoluna gedəm və sonra Nəzərdən soruşdu: –Ha tərəfə gedim, ay Nəzər? Nəzər:
–Ha tərəfə gedirsən, get, – dedi, — təki məqsədin aydın olsun.
Xosməmməd: 499 –Qaranlıqdır, ay Nəzər, — dedi, — işığı yandırsana. Nəzər: –İnsanın zəkası işıq saçmalıdır, — dedi, — elektrikdən bir şey çıxmaz. Bəli qaranlıqda bir az da oturduq, lap darıxdıq. Nağdalı: –Ay Nəzər, — dedi, — Zəhmət olmasa bir stəkan su gətir, lap ürəyim yandı. Nəzər:
–Ürək yanğısını suyla keçirmək olmaz, —dedi. Bir az gözlədik, gördük balam, kələm qonaqlığından nəinki xəbər-ətər, heç qoxu-ətir də gəlmir. Burcəli: –A kişilər, bu kələm nə oldu, — deyə soruşdu, — acından qırıldıq ki... Nəzər: –İnsanın ruhu tox olsun, qarnı ac olsa da eyb etməz deyəndə, barmağımızı dişlədik, məsələni başa düşdük. Başa düşdük ki, Nəzər müəllim, sən demə bizi kələm qonaqlığına yox, kəlam qonaqlığına dəvət eləyibmiş. Yerin məlim.
Kiçiyin Müfəttiş Miriş 500
BİZİM MÜSAHİBƏ
Bu günlərdə müxbirimiz Çığır Bağırov planetimizin ən qoca sakini 299 yaşlı Kələmulla kişiylə görüşüb müsahibə aparmışdır. Aşağıda müxbirin suallarını və Kələmullanın cavablarını veririk. Sual: Hörmətli Kələmulla, bu il siz 262 yaşından 299 yaşına qədəm qoymusunuz. Üç il bundan qabaq sizin 250 illiyinizi təntənəylə qeyd etdik. Bu barədə oxucularımıza nə deyə bilərsiniz. Daha doğrusu, 299 illik həyatınızda ən əlamətdar hadisələr hansılar olmuşdur. Cavab: Nə deyim, a bala, hər halda 60 ilim lap yaxşı yadımdadır. Ondan qalanı yaxşı yadımda deyil, o vaxt uşaq idim, nə yadımda qalacaq? Sual: Oxucularımız çox maraqlanırlar ki, siz Vaqiflə və Vidadiylə görüşmüsünüzmü? Cavab: Bəli, əlbəttə, ayıb sözdür ki, ikisini də lap yaxşı tanıyırdım. Rəhmətliklər bərk dost idilər, həmişə qoşa gəzərdilər. İndiki kimi yadımdadır, rəhmətlik Vaqif həmişə rəhmətlik Vidadiyə deyərdi ki, ey Vidadi, sən bir bu gərdişi- dövrani gəc rəftara bax e, Vidadi də cavab verərdi ki, Vaqif, sən yaxşı bilərsən, görən bu durnalar nə məkandan gəlirlər? Sual: Mirzə Fətəlini necə, görmüsünüzmü? Cavab: Bəs necə? Mirzə Fətəlini lap yaxşı tanıyırdım. Bir dəfə parapetin tinində rast gəldim, dedi, heç bilmirəm Hacı Qaranı yazım yazmayım. Dedim yaz, babalı mənim boynuma. Sual: Yəqin Sabiri də tanımısınız. Cavab: Necə ki? Sabir həmişə məni görəndə deyərdi: nə xəbər var, məşədi? Deyərdim: sağlığın, deyərdi: az çox da yenə? Rəhmətliyin yaman Mayakovskidən xoşu gələrdi. Deyərdi o kişinin mənə böyük təsiri olub.
501 Sual: Oxucularımıza bir qədər də özünüz haqqında məlumat verin. Cavab: Nə deyim, a bala, ağır günlər olub, getsin gəlməsin. Mənim atam kankan idi. Onun-bunun qapısında işləyərdi. Ona- buna quyu qazardı. Anam həmişə ona deyərdi ki, a kişi, özgəyə quyu qazan özü düşər. Qazan demişkən, qəşəng bir əhvalat düşdü yadıma: bir kərə atam evə tez gəldi, qoltuğunda da iri bir qazan, dedi arvad plovdur, qoy dəmə, mən də bu saat gəlirəm. Amma mən gəlincə çəkmə. Hə, çəkmə demişkən, söz-sözü çəkər, bir qəşəng əhvalat da düşdü yadıma: bir gün atam mənə təzə çəkmə almışdı. İndiki kimi yadımdadır, çəkməni verdi mənə, bir təpik də vurdu. Dedi, bala, çəkmənin şirnisi təpik olar, papağınkı qapaz. İnşallah sabah sənə papaq alacam. Hə, qapaz demişkən... Sual: Hörmətli Kələmulla… Cavab: Dayan, sözümü kəsmə. Kəsmə demişkən bir gözəl- göyçək, mamlı-matan, naz atan, qəmzə satan, canan vardı, ondan yaman kəsirdim. Səndən nə gizlədim, almaq istəyirdim onu. Atam dedi ki, alma. Hə, alma demişkən, alma ye, bala, utanma, gör nə şirin almadır.
|