Obrazlılıq bədii üslubun bütün səviyyələrdəki dil vahidlərinə xasdır. Burada
leksikanın məcazi mənada işlənməsindən, çoxmənalı sözlərdən, sinonimlərin bütün
növlərindən geniş istifadə olunur. Bütün vasitələr, o cümlədən də neytral vasitələr obrazlar
sistemini, sənətkarın poetik fikirlərinin həyata keçirilməsinə xidmət edir. Bədii üslubda, digər
funksional üslublardan fərqli olaraq, sözü qavramanın öz qanunları var. Sözün mənası daha
çox müəllifin qarşısına qoyduğu məqsəd, bədii əsərin janr və kompozisiya xüsusiyyətləri ilə
müəyyən olunur, hansı ki, söz də həmin əsərin elementi olur.
Bədii üslubun funksiyaları 1
.Estetik (və ya bədii) funksiya. Estetik funksiya bədii əsərin ən başlıca xüsusiyyətidir.
Bədii əsərlərdə olan informasiyalar yalnız müəyyən məlumatların verilməsi üçün deyil, həm
də ən əsası estetik təsir göstərmək, emosional hisslər oyatmaqdır. Başqa üslublar sistemində
estetik funksiya bu qədər çəkiyə malik deyil. Bədii nitqdə bütün sözlər estetik məna daşıyır və
bədii obrazın yaradılması üçün material olur.
2.
Kommunikativ funksiya. Başqa üslublar kimi bədii əsərin dili də kommunikativ
funksiyaya malikdir. Bu özünü əsərin bədii dünyasındakı informasiyalarla real dünyadakı
informasiyaların çulğalaşmasında göstərir.
Bədii üslub emosional təsiretmə gücünə görə üslub ierarxiyasında ədəbi keyfiyyətlərinə
görə yüksək zirvəyə malikdir. Uzun müddət bədii üslub ədəbi dilin formalaşması və inkişafı
üçün istiqamətverici nümunə olmuşdur, çünki bədii əsərlərin dili ədəbi dilin ən yaxşı
keyfiyyətlərini özündə tam və parlaq şəkildə əks etdirir. Bu nümunəyə əsasən dil, dil
vasitələrinin seçilməsi və istifadəsi müəyyən olunur. Yalnız XX əsrdən etibarən oxucuya
təsiretmə gücünün əhatəsinə görə kütləvi informasiya vasitələrinin dili olan
publisistika bədii
üsluba güclü rəqabət yaratdı.
