Dezinfektologiya

II. Dezinseksiya. Kamera dezinfeksiyası 
 
Dezinseksiya – yoluxucu (parazitar) xəstəliklərin törədicilərinin keçiriciləri 
olan həşaratların və gənələrin, həmçinin sanitar- gigiyenik əhəmiyyətə malik olan və 
insanların fəaliyyətinə və istirahətinə maneçilik yaradan buğumayaqlıların məhv 
edilməsidir.
Yoluxucu xəstəliklərlə mübarizə onlara qarşı elmi cəhətdən əsaslandırılmış əks 
epidemik tədbirlərin kompleks şəkildə aparılmasını nəzərdə tutur. Bu tədbirlər 
yoluxucu xəstəlikdən və epidemik prosesin xüsusiyyətindən asılı olaraq həyata 
keçirilir. Transmissiv infeksiyalar, məs: malyariya, səpkili və qayıdan yatalaq, gənə 
borreliozu, gənə ensefaliti, həmçinin bəzi bagırsaq infeksiyaları (dizenteriya, qarın 
yatalağı və s.) ilə mübarizədə tibbi dezinseksiya çox mühüm əhəmiyyət daşıyır. 
Buğumayaqlılar onurğasızların çoxsaylı tipi sayılır. Onlardan bəziləri kənd 
təsərrüfatına və meşə təsərrüfatına ziyan vurur, mebel dəstini, tikililərin ağac 
hissələrini korlayırlar; digərləri insanın və heyvanların yoluxucu xəstəliklərinin 
keçiricilədirlər.
Tibbi dezinseksiya – yoluxucu xəstəliklərin keçiriciləri olan, insana müəyyən 
zərər yetirən buğumayaqlılarla mübarizə metodlarının, vasitələrinin və üsullarının 
elmi cəhətdən əsaslandırılmış tədbirlər kompleksidir.
Tibbi dezinseksiya - entomologiyanın tərkib hissəsi olub epidemioloji və 
sanitar- gigiyenik əhəmiyyət kəsb edən buğumayaqlıları öyrənir.
Dezinseksiyanın növləri və metodları: dezinseksiya dezinfektologiyanın 
sərbəst bölmələrindən biridir. Dezinseksiya 2 növə bölünür: profilaktik və ocaqlı. 
Profilaktik dezinseksiya - buğumayaqlıların çoxalmasının və onların yaşayış 
və digər təsərrüfat tikililərində məskunlaşmasının qarşısının alınması məqsədini 
daşıyır. Profilaktik tədbirlər keçiricilərin çoxalmasına və qorunub saxlanmasına 
maneçilik törədən şəraitlərin yaradılmasından ibarətdir: müntəzəm yuyunma və 
bədənin gigiyenası, mənzildə gigiyenik qaydalara riayət edilməsi, qida məhsullarının 
və qida qalıqlarının düzgün saxlanılması, pəncərələrin və qapıların torla tutlması, 
ərazinin zibil tulantılarından təmizlənməsi və s.