Sosial Psixologiya - Mühazirələr (az) 100521161548 051021211057-1
Dr.Musa’s Library Facebook/Psixologiya Kitabları 62
olduqca mühüm cəhət ondan ibarətdir ki, insan müxtəlif sosial təsir və münasibətlərin
obyekti olmaqla bərabər, həm də həmin təsir və münasibətlərin subyektidir. Yəni, insan
bu prosesdə fəaldır. İnsan mühit ilə qarşılıqlı əlaqə prosesində fəal olmasaydı, onun
sosializasiyası mümkün olmazdı, o, sosial təcrübəni və mədəniyyəti mənimsəyə bilməzdi.
Ən nəhayət sosiallaşma bir dəfə yaranmış münasibət deyildir, o daim dəyişən,
zənginləşən, hərəkətdə, dinamikada olan münasibətdir. Hər bir fərd ayrı-ayrılıqda
özündən əvvəlki dövrdə yaşamış insanlar kimi bütün ömrü boyu sosial mühitə daxil olur,
ona uyğunlaşır. Müəyyən rol və funksiyaları qəbul edir və mənimsəyir.
Beləliklə, aydın olur ki, insanın sosializasiyası çoxcəhətli, mürəkkəb prosesdir. Bu
prosesin müəyyən bioloji əsası vardır, prosesin özü isə insanın bilavasitə sosial qrupa
daxil olmasından ibarətdir. Bunun üçün isə sosial dərketmə, sosial ünsiyyət tələb
olunur. İnsan əməli fəaliyyət vərdişlərinə, maddi əşyalar aləminə yiyələnir.
