Istehlakçını maraqlandıran ən mühüm məsələlərdən biri də əvəzetmənin son normasına nail olmaqdır. Əvəzetmənin son norması dedikdə istehlakçının hər hansı bir əmtəədən əlavə vahidin satın alınması üçün imtina etdiyi başqa əmtəələrin maksimum miqdarını göstərən ölçü nəzərdə tutulur. Bir əmtəənin istehlakından əldə edilən faydalılığın artması başqa bir əmtəənin istehlakının azalmasına uyğun gəlməlidir. Bu, nəticə etibarilə şəxsi büdcədən sərf olunan vəsaitin hər vahidinə görə səmərənin eyni səviyyədə olmasını təmin edir. Istehlakçı xərclədiyi pulun səmərəliliyini, nəinki bir-birini qarşılıqlı surətdə əvəz edən əmtəələri satın almaqla, həm də onların qiymətlərinə xüsusi diqqət yetirməklə təmin etməyə çalışır. Başqa sözlə, bir-birini qarşılıqlı əvəz edən əmtəələr arasındakı proporsiyalarıtarazlaşdırmağa məhz qiymətlər imkan verir. Bir əmtəənin başqa bir əmtəə ilə əvəz olunmasının son norması qarşılıqlı surətdə əvəz olunan əmtəələrin qiymətləri arasındakı nisbətə bərabər olmalıdır. Məsələn, istehlakçı maksimum fayda götürmək üçün «x» və «y» əmtəələrini bir-biri ilə əvəz etmək istəyirsə, onda o, əvəzetmənin aşağıdakı kimi ifadə olunan normasını əldə rəhbər tutmalıdır:
Burada MRSx,y-əvəzetmənin son norması, MU- əmtəənin son faydalılığı, P- əmtəələrin qiymətlərini göstərir. Buradan aydın olur ki, «x» əmtəəsindən əlavə vahi-din satın alınmasına sərf olunan pul vəsaitinin hər vahidi-nin faydalılığı, «y» əmtəəsinin əlavə hər vahidinin satın alınmasına sərf olunan pul vəsaitinin faydalılığından yük-sək olduqda istehlakçı «x» əmtəəsindən, əksinə olduqda isə «y» əmtəəsindən daha çox satın almağa çalışır. Və deməli, alıcı əlində olan pul vəsaitini onun üçün daha çox fayda verən məhsullar arasında bölüşdürməklə əvəzetmənin son normasının təmin olunmasına şərait yaradır.
Aydındır ki, «x» əmtəəsinin son faydalılığı özünün qiymətindən deyək ki, 2 dəfə, «y» əmtəəsininki isə 3 dəfə yüksək olduqda, pul vəsaiti sərfinin bərabər son faydalılığı prinsipi pozulur. Bu, onunla əlaqədardır ki, «y» əmtəəsinin hər vahidinə sərf olunan əlavə pul vəsaiti, «x» əmtəəsinin hər vahidinə sərf olunan əlavə pul vəsaitinə nisbətən daha çox fayda gətirir. Buna görə də alıcı pul vəsaitinin bir hissəsini «x» əmtəəsinin satın alınmasından «y» əmtəəsinin satın alınmasına «keçirir». Bu əmtəələrin faydalılıqları arasındakı fərq bir növ alıcının «ixtiraçılıq», «səmərələşdiricilik» qabiliyyətinin nəticəsi kimi meydana çıxır. Odur ki, alıcı bunları nəzərə almaqla bazarda «manevr edir».
Dostları ilə paylaş: |