Milli məclisin xalq kütlələrinə qarşı çevrilmiş tədbirləri. Fransada fəhlə qrupları öz vəziyyətlərini yaxşılaşdırmaq uğrunda mübarizəni gücləndirdilər. Paris mətbəə fəhlələri hələ 1789-cu ildə «Bəşər dostları cəmiyyəti» adlı təşkilat yaratdılar. Paris dülgərləri 1791-1792-ci ilin yazında həmkarlar «Qardaşlıq ittifaqı»nı təşkil etdilər. Minlərlə sənətkarlar bu ittifaqa qoşuldular. XVIII əsrin axırında fransız fəhlələri təşkilati zəifliyinə və azsaylı olduqlarına görə müstəqil siyasi qüvvə ola bilməzdi. 1791-ci ilin yazında Paris sənətkarları və fəhlələri öz sıralarım birləşdirməyə cəhd etdilər.Tətil mübarizəsinin inkişafını dayandırmaq və fəhlələrin siyasi təşkilatlarını rüşeym halında məhv etmək üçün Müəssislər məclisi 1791-ci il iyunun 14-də dekret verdi. Bu dekretin verilməsini deputat Le Şapelye təklif etmişdi. Marks le Şapelye dekretini «burjua dövlət çevrilişi» adlandırmışdı. Bu dekret fəhlələri yenicə əldə etdiyi ittifaqlar, tətillər, birləşmələr hüququndan məhrum etdi.
