CAVAD HEYƏTĠN ÖPDÜYÜ ƏLLƏR
Rafael HÜSEYNOV
Milli Məclisin deputatı, akademik (Azərbaycan)
Həyatının 90-cı ilində böyük azərbaycanlı Cavad He-
yətin Vətən və millət məhəbbəti ilə dolu ürəyi dayandı.
Ömrü boyu onun iĢi ürəklə olmuĢdu. Nə iĢ görmüĢ-
düsə, ürəklə görmüĢdü və təməl peĢəsi olan həkimlikdə də
əsas sahəsi ürək idi.
Hələ cavan yaĢlarından misilsiz bir ürək cərrahı kimi
dünyada məĢhurlaĢmıĢdı. Lakin tale ona daha ali bir mis-
siyanı – millətinin ürəyinin və xalqının ruhunun müalici
olmaq vəzifəsini də həvalə edibmiĢ.
Belə insanların isə ürəyi heç vaxt dayana bilməz.
Sənəti ürəklərə Ģəfa vermək olan doktor Cavad Heyət,
əslində, öz ürəyinin salamatlığının da çarəsini irəlicədən
həll edibmiĢ.
O öz könlünü tükənməz bir enerji qaynağına – bütöv
millətinin və qövmünün qəlbinə bənd etmiĢdi: ora güc
verirdi, oradan güc alırdı.
Azərbaycan, türk dünyası naminə yaratdığı dəyəri sözə
sığmaz əsərləri və əməllərində Cavad Heyətin qəlbi,
əlbəttə ki, hələ bundan sonrakı çox zamanlar boyu çırpın-
maqda davam edəcək.
Həssas vətənpərvər Bəxtiyar Vahabzadə dostu Cavad
bəyin timsalında bir məslək, əqidə qardaĢını görür, Heyə-
tin ucalığına belə heyrətlənirdi:
10
...Gecə də, gündüz də hey döyüĢdəsən,
Mənəvi, cismani ağrılarla sən.
Həkim nüsxələri yazdın həmiĢə,
Xəstə Ģəfa tapıb sağaldı... fəqət,
Ədib qələmiylə yazdığın nüsxə
Bir xalqın dərdinə Ģəfadır, əlbət!
Dünya boyu səpələnmiĢ, sayı 50 milyonu aĢan azər-
baycanlılar arasında bu gün böyük Ģəxsiyyətlər, Azərbay-
canın adını yüksəldən müstəsnalar az deyil.
Lakin müasirimiz, bizimlə eyni günlərin içərisində
yaĢamıĢ canlı klassik, ömrünün axırınadək mütəfəkkir
zəkasının aydınlığını, Ģəfqət və sərrastlığını saxlayaraq
xalqı üçün faydalı iĢlərini yerinə yetirməkdə davam edən
Cavad Heyəti heç kəslə müqayisə etmək mümkün deyil.
O, birincilərin birincisi idi.
Çünki bir var hər hansı elm, ictimai-siyasi fəaliyyət
sahəsində dünyada məĢhur olasan və çox zaman sənin
azərbaycanlılığın yalnız elə mənĢəcə bu xalqa mənsub
olduğunla bitsin, bir də var öz sahəndə ali səviyyəli pe-
Ģəkar ola-ola həm də atəĢin vətənpərvər, millətsevər kimi
misilsiz əməklər sərf edəsən, bu səyləri həyatının baĢlıca
mənasına çevirəsən.
Bu tərəzidə lap dünyadakı ən üstün soydaĢımız Lütfi
Zadədən tutmuĢ tanıdığınız ən məĢhur, ən qüdrətli azər-
baycanlılaradək kimi Cavad Heyətlə yanaĢı qoymaq olar?
O, yalnız Vətəni Azərbaycanın, ata yurdu Ġranın, min
bir tellərlə bağlı olduğu Türkiyənin deyil, bütün dünyanın
vətəndaĢı olan nadir insanlardan idi. Çünki böyük yolunun
baĢlanğıcında həkimlik sənətini seçmiĢdi və bu peĢə sahi-
binin də ali vəzifəsi insana xidmət, insan həyatını hifz et-
məkdən ibarətdir. Lakin ömrü uzunu beynəlmiləlçi, in-
11
sançı qala-qala doktor Cavad Heyət təpədən-dırnağa qədər
vətənpərvər, millətsevər olmağı da bacardı, xalqının mə-
nəviyyatı ilə bağlı dəyərləri qorumaq, yaĢatmaq amalına
hər an sədaqət göstərdi və həm də bu etibarlılığını bir-
birindən qiymətli əsərləri, yorulmaz fəaliyyətləri ilə sübut
etdi.
Belə Vətən və millət aĢiqi olan, həm də bu təhər
nəhəng iĢlər görməyi bacaran, bu sayaq tükənməz bilik və
qabiliyyətlərə sahib, bunca qüdrətli, epoxal Ģəxsiyyət bir
də nə zaman yaranacaq?
Ümumən bundan belə ikinci belə bir Ģəxsiyyətin yeti-
Ģəcəyi ağlasığmazdır.
Fərdi keyfiyyətlərdən savayı, içərisindən adlanmıĢ
mürəkkəbdən-mürəkkəb, dünya tarixinin ən təlatümlü, ən
tərəqqili, ən eniĢli-yoxuĢlu, nəsilləri fərqli olan bir əsrə
yaxın zaman parçası da var axı!
ġəxsiyyətləri, hadisələri, mühiti, koloriti ilə həmin
dövr bir daha təkrarlanmayacaq!
* * *
Əsl yurdsevərin, həqiqi millətpərvərin kimliyi Vətən
və xalq taleyinin qəliz sınaqları müstəvisində, tarixi
darmacallarda ortaya çıxır.
Qaldırın yaxın keçmiĢimizi, arayın ki, 1990-cı ilin əv-
vəllərində bir sıra xarici qüvvələrin dəstəyi və yönəltməsi
nəticəsində Ermənistanın əli ilə Azərbaycan torpaqları
qəsb olunanda, yüz minlərlə soydaĢımız müsibətlərə ürcah
ediləndə dünyada məĢhur olan azərbaycanlılardan hansı
biri Cavad Heyət kimi mərd-mərdanə köksünü irəli verdi,
bizi onun kimi canıyananlıqla, milli təəssübkeĢliklə müda-
fiə etdi, dünyanı və qardaĢ ölkələri qətiyyətlə Azərbaycana
arxa durmağa, yardım etməyə çağırdı?!
12
Bu, Cavad Heyətin həmin cəhdlərindən bircəsidir.
Doktor 1993-cü il noyabrın 21-də qəlbi qanaya-qanaya
Türkiyə Cümhuriyyətinin Prezidenti, 50 ildən bəri tanı-
dığı, yaxın münasibətlərdə olduğu cümhur baĢqanı Süley-
man Dəmirələ açıq məktubunda belə yazırdı: ―Bu gün
Arazın quzeyindəki dindaĢ və soydaĢlarımız, yəni azəri
qardaĢlarımız tarixdə az rastlaĢdığımız bir faciə və soy-
qırımına məruz qalmıĢlar, həm də böyük bir millət və ya
güclü bir dövlət tərəfindən deyil, bütün tarix boyu hima-
yəmiz altında yaĢayan və ədalətimiz sayəsində bütün
insani haqlardan faydalanan ermənilər tərəfindən! Təbiidir
ki, onların belə azğınlıq və cinayətə təĢəbbüs və cəsarət
göstərmələrinə səbəb bütün müsəlmanların, ələlxüsus türk-
lərin düĢməni olan bugünkü böyük dövlətlərin dəstəkləri
və yardımları olmuĢdur.
Belə bir durum qarĢısında müsəlman dünyasının, Tür-
kiyə və Ġran Ġslam Cümhuriyyətinin və uluslarımızın və-
zifə və məsuliyyətləri nə ola bilər?
Bu məzlum, silahsız, ordusuz və əsarətdən yenicə
çıxmıĢ qardaĢlarımızı yalqızmı buraxmalıyıq?
Bu sətirləri göz yaĢlarımın qabağını ala bilmədən
yazıram. Və bu anda Allah-taaladan xalqımıza qurtuluĢ, ya
da özümə ölüm diləyirəm. "Əl-mövt xeyrun min rüku
billari", yəni ―Ölüm zillət çəkməkdən yaxĢıdır‖ (Ġmam
Hüseynin AĢura günü Kərbəla meydanında Ģəhid olmaz-
dan qabaq söylədiyi sözlərdir – R.H.).
Bu gün mənim əlimdəki qələm-kağız və quru nəfəsim-
dən baĢqa bir Ģeyim yoxdur, onları da məzlum xalqımızın
yolunda sevə-sevə verməyə razıyam. Bilirəm ki, bu gün
xalqımın qələmdən çox süngüyə ehtiyacı vardır.
Ciddi ölüm təhlükəsində qalan məzlum azəri qardaĢ-
larımızın yardımına qalxın!"
13
Bu gün bu sözləri demək, bəlkə də, asandır. Amma o
vaxt üzdəki heç bir siyasətçi, ictimai Ģəxs bu cür kəskin
tonda danıĢmırdı. Bu məktub-bəyanat həm də o qəbil
baĢqa çağırıĢların yaranmasına meydan açırdı, yatmıĢları
oyadan həyəcan təbili idi.
Adətən, siyasi mövzularda həmiĢə ehtiyatla yazıb-
danıĢan Cavad Heyət bu müraciətində ona dəyə biləcək
istənilən zərbəyə rəğmən sinəsini irəli vermiĢdi.
Bunca fədakarlığı unutmaq olarmı!
Belə bir VƏTƏNDAġla ayrılığın acısı bu gün hər bir
qaçqınımızın, köçkünümüzün, yurddaĢımızın evində ən
içdən gələn məhəbbətlə yaĢanmasa, biz nankor olardıq!
* * *
Çoxcəhətli, çoxistiqamətli biliklər yiyəsi Cavad He-
yətin səriĢtə ilə bildiyi elm sahələrindən biri də ilahiyyat,
islamĢünaslıq idi və o, bu sahədə müqayisəsiz üstünlüyə
malik idi. Təbii ki, bunca püxtə islamĢünasdan ötrü Məkkə
də, Mədinə də ən müqəddəs Ģəhərlər idi. Lakin dünyanı və
özünü dərk etdiyi çağlardan ailəsinin ona aĢıladığı və
özünün dərk etdiyi baĢlıca meyarlardan biri bu olmuĢdu
ki, Təbrizlə Bakı onun Məkkəsi ilə Mədinəsidir.
1925-ci il mayın 23-də Təbrizdə doğuldu, 2014-cü il
avqustun 12-də Bakıda əbədiyyətə qovuĢdu.
Cavad Heyət Azərbaycan Respublikasının vətəndaĢı
deyildi.
Lakin o, dünyasını dəyiĢəndə dövlət səviyyəsində ilk
vida sözləri Bakıda yayıldı və həmin ehtiram dolu mətnin
altındakı əvvəlinci imza da dövlətin birinci Ģəxsinin adı,
ölkə Prezidentinin imzası idi.
Bircə bunun özü Cavad Heyətin nə qədər fövqəladə,
Azərbaycandan ötrü nə qədər mühüm Ģəxsiyyət olma-
sından deyir.
14
* * *
Cavad Heyət elə bir ailədə doğulmuĢdu, elə nəsillərin
və elə ocağın yavrusu idi ki, onun biliklə, kitabla, yüksək
əxlaqi dəyərlərlə bağlı olması labüd idi.
Bir dəfə ondan soruĢmuĢdum ki, Siz artıq ustadlar
ustadısınız, ömrünüzdən də çox müəllimlər keçib. Bu
qədər dərin biliklər əldə edəndən sonra həyatınızdakı
müəllimlərdən hansını göz önünə gətirərkən yenə özünüzü
Ģagird məqamında təsəvvür edirsiniz?
Cavab vermiĢdi ki, sözün bütün mənalarında mənim ən
birinci müəllimim atam olub. Həm əvvəlinci, həm də ən
baĢ mənasında.
Cavad Heyətin atası, 1879-cu ildə dünyaya gəlmiĢ
Mirzə Əli Heyət gənc yaĢlarında Nəcəfə yollanaraq 7 il
mükəmməl ali ilahiyyat təhsili almıĢdı, fiqhdən – dini
hüquqdan tutmuĢ üsul, hikmət, kəlam, riyaziyyat, yüksək
astronomiya, köhnə və yeni fəlsəfəyədək bir çox elm
sahələrinə dərindən vaqif olmuĢdu. Biliklərlə ləbələb, öy-
rənməkdən usanmayan Mirzə Əli hələ bundan sonra Ġstan-
bul və Qahirəyə gedərək oralarda da 1 il elmi araĢdır-
malarla məĢğul olmuĢ, bir qədər də dərinləĢmiĢdi.
Paklıq, düzlük və bilginliyin timsalı Mirzə Əli 1967-ci
ildə dünyasını dəyiĢənədək Ġranın dövlətçilik, düĢüncə və
mənəviyyat həyatındakı seçkin simalardan olmuĢ, Təbriz
məhkəməsinin ilk sədri, Ġranın BaĢ prokuroru və daha
sonra ədliyyə naziri iĢləmiĢdi.
Təsəvvür edin Mirzə Əli Heyət hansı savada və
səviyyəyə malik imiĢ ki, dünyanın hər üzünü, alim və
müəllimlərin hər cürünü görmüĢ Cavad Heyət lap ixtiyar
çağlarında da atasını ömrü boyu tanımıĢ olduğu müəllim
və alimlərin ən kamili hesab edirdi. Onun adını çəkəndə
kövrəlirdi, boynuna alırdı ki, atasını hər insandan, öz
15
övladlarından, hətta doğmaca anası Məsumə Sultandan da
artıq sevmiĢdir.
―10 bacı-qardaĢ idik. Amma anam məni bütün
uĢaqlardan çox istəyirdi. Bir gün mənə Ģikayətləndi ki,
oğul, sən özün Ģahidsən ki, mənim sənə məhəbbətim o biri
uĢaqlara olan sevgimdən qat-qat çoxdur. Bəs sən niyə
atanı məndən çox istəyirsən? Dedim ki, ay ana, axı bunun
ixtiyarı mənim əlimdə deyil...‖
Bir dəfə Cavad Heyətdən bunu da xəbər aldım ki, bəs
ən böyük müəllim saydığınız atanızın hansı nəsihətini ən
vacib bilir, ömrünüzün əsas düsturu sayırsınız? Söylədi ki,
atam həmiĢə məsləhət edərdi, nə iĢ görsən, ehsasatın
(duyğuların – R.H.) səninlə olsun, amma ağlı da unutma.
Doktor bütün yolu boyunca bu düsturdan kənara
çıxmadı. Nə etdisə sevərək, ürəkdən, eĢqlə etdi, ancaq heç
vaxt da emosiyaların tam əsirinə çevrilmədi, soyuq dər-
rakəsi, hər xırdalığı nəzərə alan fəhmi həmiĢə sərvaxt
dayandı. Ona görə də mürəkkəb siyasi və ictimai dövrlərin
burulğanlarından keçib irəlilədiyi uzun onillərdə heç vaxt
yıxılmadı, bürdəmədi, yanılmadı.
Bəs doktorun da daĢıdığı ―Heyət‖ soyadının kökü
haradan gəlir?
Mirzə Əli artıq cavanlığından el-oba arasında da, ali
dövlət dairələrində də savadına, dünyagörüĢünə, ədalətli-
liyinə, doğruculluğuna görə sözü keçən, sayğı bəslənən
ziyalı idi. O qədər mötəbər ki, Ġranda – ölkədaxili və xarici
vacib səfərlər üçün təĢkil olunan mühüm nümayəndə
heyətlərinə mütəmadi baĢçı təyin edilərmiĢ. Bunlardan
birincisi vaqe olubmuĢ 1906-cı ildə.
Məhəmmədəli Ģahın dövlət çevriliĢindən sonra Nə-
cəfdə ilahiyyat tələbələrindən ibarət bir heyət qurulur.
Əvvəlcə Bəsrəyə, sonra Ġrana MəĢrutiyyət fərmanını apa-
ran üç böyük din böyüyü – Ayətullah Tehrani, Ayətullah
16
Mazandarani və Axund Molla Kazım Xorasani, eləcə də
digər nüfuzlu, biĢkin Ģəxsiyyətlərin daxil edildiyi heyətə
onlardan xeyli gənc Mirzə Əli rəhbər seçilmiĢdi.
Gedir, danıĢıqlar aparır və MəĢrutiyyətin bərpasına
nail olur.
1919-cu ildə ermənilər Naxçıvanda zavallı insanları
olmazın zülmlərə məruz qoyanda, Ģiddətli təzyiqləri ilə bu
bölgəni Azərbaycan Xalq Cümhuriyyətindən qopararaq
Ermənistana qatmaqçün canfəĢanlıqlar edəndə naçar qalan
əhali Qacar vəliəhdi Məhəmmədhəsən Mirzədən kömək
diləmiĢdi və o da Tehranın ―hə‖sini alaraq Mirzə Əlini bir
yardım heyəti və rəsmi məktubla Naxçıvana yola sal-
mıĢdı...
Bu minvalla hələ cavankən ağsaqqal ehtiramına sahib
olan Mirzə Əli "Heyət" təxəllüsünü qazanıbmıĢ və sonra
həmin kəlmə çevrilir ailənin soyadına.
Mirzə Əli Heyət on övladının onuna da yaxĢı tərbiyə
və təhsil verməyə səy etmiĢdi, amma nədirsə, elə yeni-
yetməlik çağlarından Cavada bəslədiyi ümidlər daha məx-
susi imiĢ.
Tehranda ali tibb təhsili alan Cavadı atası üçüncü
kursdan sonra oxumağını davam etdirmək üçün Türkiyəyə
göndərməyi qət edir. O zaman Ġranla Türkiyə arasında 100
tələbə mübadiləsi haqda bir anlaĢma imzalanıbmıĢ. Lakin
müəyyən səbəblərdən bu layihənin gerçəkləĢməsi ləngiyir-
miĢ və Cavad atasına müraciət edir ki, tələbə dostlarımdan
təhsili davam etdirmək üçün Beyruta gedənlər var, bəlkə,
icazə verəsiniz, mən də gözləməyim, elə onlara qoĢulub
gedim.
Atası etiraz edir ki, oğlum, gün gələcək, sən Parisə də
gedəcəksən, Amerikaya da. Mənim imkanım olsaydı, səni
Türkiyəyə yox, Bakıya göndərərdim. Amma arada dəmir
pərdə var. Türkiyəyə getməyini ona görə arzulayıram ki,
17
yalnız tibb təhsili almayasan, həm də gedib öz dilini,
mədəniyyətini, tarixini bir az da dərindən öyrənəsən.
Ömrün ixtiyar mərhələsində bütün nail olduqlarına
vaxtın hündürlüyündən baxan Cavad Heyət atasının bu
strateji məqsədli addımına görə ona sonsuz dərəcədə
borclu olduğunu rəhmətlərlə dilə gətirirdi. ġükranlıqla
anırdı ki, məhz Türkiyədəki təhsil dövründə axarında ol-
duğu elmi ab-hava, oxuduğu kitablar, oturub-durduğu
alimlər, təmas bağladığı ziyalılar təbib olduğu halda onun
həm də bir türkoloqa, azərbaycanĢünasa çevrilməsinə
möhkəm, sağlam özül yaratdı.
"Atam davranıĢlarında, danıĢığında, insanlara müna-
sibətlərində, əməllərində istisnasız olaraq həmiĢə səbirli,
nəzakətli, düzlüksevər, ölçü gözləyən, səliqəli bir kiĢi idi.
Yalnız camaat arasında olanda deyil, lap evdə, otaqda tək
qalanda da belə idi. Bu onun təbiəti idi".
Gecə saatlarında doktor Cavad Heyətin artıq yadigara
çevrilmiĢ, 2008-ci ildə lentə aldığım söhbətini dinləyirəm,
aramla ömür hekayətini söyləyir, məni ayrı bir aləmə
aparır və dinləyə-dinləyə fikirləĢirəm ki, axı o da bu
baxımdan atası ilə eyni idi.
Kübarlığın, alicənablığın, nazikliyin qüsursuz nümu-
nəsi idi. Haçağ evinə görüĢünə getdimsə, lap sağlığının
son aylarınacan – hərdən xəstə, üzgün, yorğun olduğu
vaxtda da məni səliqə ilə geyinmiĢ halda, kostyumda,
qalstukda, beretdə, sifətinin mehriban ifadəsi ilə qarĢıladı.
Məni və hər kəsi.
Cavad bəy yüksək daxili mədəniyyətə malik idi, əsl
centlmen idi.
2010-cu ildə yoldaĢım Tehranda əməliyyat olunmuĢdu.
Cavad bəy mütəmadi olaraq gündə bir neçə dəfə bizimlə,
həkimlərlə telefon əlaqəsi saxlayırdı. Xəstəxanadan
buraxılandan sonra isə Ģəhərin o baĢından durub gəlmiĢdi
18
mehmanxanada yoluxmağa. Qınadım ki, axı niyə əziyyət
çəkmisiniz!
Çünki o günlərdə doktorun özü də bir qədər nasaz idi,
sağ ayağının barmaqlarında yara əmələ gəlmiĢdi, müxtəlif
məlhəmlər yaxırdı və hərəkət etməsi də çətin idi.
Həmin gəliĢi vaxtı çəkilmiĢ fotolarımız da qalır:
ayaqqabılarının tayları fərqlidir. Yaralı, sarıqlı, buna görə
çəkməyə girməyən sağ ayağına dabansız, burunsuz yüngül
baĢmaq keçirib, sol ayağında isə qara çəkmə...
Cavad Heyət böyük alim olmaqla bərabər, böyük də
insan idi, tərbiyəliliyin, əsilzadəliyin ibrət alınası örnəyi
idi. Elə bir örnək ki, ona oxĢamağa çalıĢmaq olur, lakin
tam o cür olmağa heç də həmiĢə, ən azı, səbrin çatmır.
Tam o cür ola bilməkçün gərək həmin keyfiyyətləri,
yerinə yetirməli olduğun Ģərtləri sadəcə qəbul etməyəsən,
onları doktor kimi, onun atası sayaq məhz öz təbiətinə
çevirəsən.
"Atam müasir düĢünən, açıq fikirli bir Ģəxs idi. Amma
eyni zamanda etiqadlı, imanlı bir insan idi, əxlaqən ruhani
idi, namaz qılardı, içki içməzdi. Hər kəs də bunu bilirdi.
Bir dəfə Ġranın BaĢ naziri doktor Əli Əmini bizə qonaq
gəlmiĢdi. Atam da, qardaĢlarım da bizdə idilər. Süfrə
açılmıĢdı. Bilirdik ki, Əli Əmini içkiyə biganə deyil.
YaxınlaĢıb qulağına pıçıldadım ki, atamızın yanında sizə
içki təklif edə bilmərik. Amma qonĢu otaqda viski ha-
zırlamıĢıq, istəyirsinizsə, buyurub keçin, orada nuĢ edin. O
da qayıtdı ki, yox, mən də ağa-yi Heyətin yanında iç-
mərəm.
Atamın bu qədər hörmətini saxlardılar".
Bunlar da doktor Cavad Heyətin xatirələrindəndir və
onun hansı ailə məktəbindən keçərək yetiĢməsinin daha
bir cizgisidir.
19
Orta məktəbdən sonra Cavad bəy hərbi liseyə daxil
olubmuĢ və öz hekayətincə, orada da birinciymiĢ. Di gəl,
hiss edir ki, hərb onun tutub gedəcəyi yol deyil, səmtini
təbabətə dəyiĢir.
Lakin ailə tərbiyəsindən və həmin ilk hərbi təhsilindən
gələn sərt daxili intizam sonacan Cavad Heyətlə qaldı.
Axır illəri əsasən Bakıda yaĢayırdı, arada Tehrana
gedib-gəlirdi.
Hər gedəndə mütləq zəng vururdu ki, filan gün yola
düĢürəm, hər qayıdanda mütləq telefon açırdı ki, geri
dönmüĢəm. Bunlar elə xüsusiyyətlərdir ki, onları öyrətmək
olmur, gərək belə bir intizam, dəqiqlik, sahman, davranıĢ
səliqəsi canında ola. Daxilində belə bir dəqiqlik və intizam
nəbz kimi vurduğundandır ki, Cavad Heyət bu qədər çox,
bu qədər xeyirli və bir-birinə bənzəməyən ciddi iĢlər
görməyə müvəffəq olub.
* * *
1946-cı ildə Ġstanbulda tibb təhsilini baĢa vurduqdan
sonra üç il cərrahlıq üzrə təcrübə, daha sonra isə Parisdə
daha üç il bu yöndə təkmilləĢmə keçmiĢdi. Ġrana qayıdıb
iĢə baĢlamıĢdı, amma daha çox öyrənmək, bir az da
kamilləĢmək istəyi onu yeni yolçuluqlara səfərbər etmiĢdi.
Amerikada müxtəlif klinikalarda çalıĢmıĢdı, Danimarkada,
Kopenhagendə iĢləmiĢdi.
Ġranda bir sıra iri xəstəxanaları quran, böyrək dəyiĢ-
dirilməsi, açıq ürək əməliyyatları və sair möcüzə kimi
görünən bir çox baĢqa təbabət hünərlərini ilk dəfə göstərən
Cavad Heyət olub.
Onun ―Tromboflebit və müalicəsi‖ (1957), "Ümumi
cərrahlıq" (1965), "Cərrahiyyə dərslikləri" (1997) kitab-
ları, təbabətin müxtəlif çətin məsələlərinə aid bolluca
təcrübə və təhlillər əsasında qələmə alınmıĢ 100-dək araĢ-
20
dırma-məqaləsi sərrast müĢahidələriylə, elmdə yeni söz
olan tapıntılarıyla seçilir.
Naturasında naĢirliyə, elmi kütləviləĢdirməyə meyil
olduğundan elə həmin çağlarda ―DaneĢ-e pezeĢki‖ (―Tə-
babət elmi‖) adlı dərgi buraxmağa baĢlamıĢ və həmin jur-
nal 1964-1976-cı illərdə iĢıq üzü görmüĢdür. Bir çox tibb
araĢdırmaçısı üçün münasib elmi laboratoriyaya, özünü-
ifadə meydanına dönən həmin dərgidə Cavad Heyətin
özünün 60-dan artıq dəyərli məqaləsi dərc edilmiĢdir.
* * *
Ensiklopediklik, universallıq orta əsr alimlərinə xas
keyfiyyətlərdən imiĢ. Həm ġərqdə, həm Qərbdə. Bizim
dövrdə isə nəinki müxtəlif elm sahələrində, hətta bir elm
sahəsinin daxilində belə onun müxtəlif istiqamətlərinə
hərtərəfli bələd olan mütəxəssislərə seyrək rast gəlinir.
Cavad Heyətsə həm də bir tarixçi, ədəbiyyatĢünas,
folklorçu, dilçi, filosof, mədəniyyətĢünas, ilahiyyatçı idi.
Bu istiqamətlərin də hər birinə aid köhnəlməz,
masaüstü olmağa yaraĢan əsərlərin müəllifidir.
O həmin elm sahələrinin heç birində peĢəkar deyildi və
ona görə də araĢdırmaları akademik biçim daĢımır. Lakin
biliklərinin geniĢ çevrəsi, problemləri çox üstdən, pano-
ramda seyr edə bilməsi və güzəĢtsiz milli mövqeyi ona
imkan verib ki, dilimiz, ədəbiyyatımız, mədəniyyətimiz
haqqında ən peĢəkar araĢdırıcıların ən akademik tədqiq-
lərindən geri qalmayan faydalı əsərlər doğursun. Həm də o
əsərlərin hər birində qəlib, model olmaq siqləti var. Yəni
məhz o dəst-xətlə, o yanaĢma ilə, o qeyrətlə yazmağı
təlqin və təĢviq edən ülgü!
21
* * *
Cavad Heyətin bir üstünlüyü də onun nəyi necə
deməyin üsullarına məharətlə yiyələnməsi, mətləbləri hər
kəsin qavraya bilməsindən ötrü hansı sadəlikdə yazmağın
gizlinclərinə bələd olması, bir də, ən lazımlısı, fikirlərini
siyasi incəlik və nazik sərhədləri nəzərdə tutaraq, xəfif
pərdəni aradan itirməyərək, heç bir tərəfi incitmədən
ustalıqla ifadə etməsi idi.
―Varlıq‖ın nübar sayında, birinci buraxılıĢında Həmid
Nütqinin ―Ana dili – sevgili dil‖ adlı uzun Ģeirini dərc
etmiĢdi. Həmin mənzumənin misralarında tamam tarixi-
miz, yolumuz, dərdlərimiz, qayğılarımız, ümidlərimiz əks
olunub. Həm də bütün bunların yanında bir redaktor
məharəti sezilir (söz yox, Cavad bəy əski dostu ilə bu
proqram xarakterli Ģeirin nə təhər olmasını, hansı nöqtə-
lərə vurmasını da dönə-dönə müzakirə etmiĢdi), mühiti,
ətrafı, münasibətləri nəzərdə saxlamaq, həddi aĢmamaq
taktı da duyulur:
Ġranı abad, bizləri Ģad istəməyənlər,
Öz nəfi üçün hər zadı bərbad eləyənlər,
Bu ölkədə əqvam ara hər haqqı dananlar
Öz niyyətini eylədilər beyləcə izhar:
―Bu irqin o bir irqlərə üstünlüyü varmıĢ,
―Arya‖dan olan olmayana fəxr satarmıĢ.
―Türki‖ deyə bir dil nə gəzər, ―azəri‖ varmıĢ,
Milyonla o dildə danıĢansa xatakarmıĢ‖.
Lakin bu qaranlıq da, nəhayət, sona ərdi,
Buzlar əridi, yel də bahar müjdəsi verdi.
Gəl, qardaĢım, ey fars danıĢan yar ü bəradər,
Qoy mazidə qalsın qara günlər, ağır illər.
...Qoy bədxahımız bizdəki birlikdən üzülsün,
Qoy ölkədə həm türk üzü, həm fars üzü gülsün.
22
XV yüzildə ƏliĢir Nəvai bütün türk dünyasında son-
rakı əsrlər ərzində həmiĢə qələm Ģücaəti kimi dəyərlən-
diriləcək ―Mühakimət ül-lüğəteyn‖ risaləsini yazdı. XX
əsrdə isə Cavad Heyət fars dilində ―Müqayisət ül-lüğə-
teyn‖ kitabını doğuraraq (1991) ulu sələfin türkcənin
üstünlüklərini nümayiĢ etdirən əsərindən geri qalmayan bir
hünərə imza atdı.
TutuĢdurun – Nəvai öz risaləsində fars dilində qarĢılığı
olmayan 100 türk kəlməsini gətirərək təhlillərini apar-
mıĢdı. Cavad Heyət isə ―Müqayisət ül-lüğəteyn‖də 1700
belə sözü tədqiqata cəlb edir, kitabın yaranmasının ümdə
səbəblərindən birini isə belə niĢan verirdi: ―Kitabı farsca
yazdım ki, onu bütün iranlılar oxuya bilsin. Türk olub öz
dilini və onun əhəmiyyətini yaxĢı bilməyənlər, ya da
asimilə olunmuĢlar gerçəkləri öyrənib təqdir etsinlər‖.
Orta əsr ġərq Ģairinə, aliminə çoxdillilik də xas olub.
ġairlərimizin, filosoflarımızın əksəri orta əsrlərdə üçdilli
olub, farsca, ərəbcə, türkcə yazıb-yaradıb. Cavad Heyət bu
baxımdan da klassik babaların müasir zamana uyğun
davamçısı idi. Azərbaycan dilini, Türkiyə türkcəsini, fars-
canı, ərəbcəni ana dili kimi bilirdi, eyni zamanda, fransız-
cası, ingiliscəsi sərbəst idi. Və danıĢdığı dillərin hər bi-
rində də əsərləri var.
Beləcə, bir yığın ġərq və Qərb dilləri ilə aĢinalığı
Cavad Heyətə ana dilinin, bütövlükdə türkcənin üstün-
lüklərini bariz Ģəkildə əyan etməyə imkan yaradırdı.
Cəsarətlə, əminliklə yazırdı ki, feil sisteminin zəngin-
liyinə və çevikliyinə, yeni sözyaratma keyfiyyətinin hü-
dudsuzluğuna görə türkcə istənilən dillə yarıĢa çıxıb qalib
gələr. Verdiyi bircə nümunə bu həqiqəti anındaca danıĢıq-
sız isbat edirdi: ―Oxumaq‖ feilindən görün cüzi dəyiĢik-
liklə nə qədər yeni feillər törəyə bilir: oxutmaq, oxunmaq,
oxutdurmaq. Amma bircə bu sonuncu feili farsca ifadə
23
etmək üçün iri bir cümlə yazmaq lazımdır: ―QozaĢtən-e
kəsi be mədrəse ta be u xandən yad bedəhənd‖ (Bir kəsi
ona oxumağı öyrətməkdən ötrü məktəbə qoymaq – R.H.).
Eynən rusca, ingiliscə və sair br çox dillərdə də həmin
təhərdir.
Cavad Heyət insan bədənini, insan ürəyini, böyrəyini
yarıb içərisində əlləĢə, çarələr qıla bildiyi kimi, elə bir
cərrah kimi cümlələrin, sözlərin də adi gözlərə görün-
məyən diblərinə, dərinlərinə daxil olaraq naməlumları
aĢkara çıxarmaq iqtidarında idi.
* * *
...Onun necə qabil bir cərrah olması haqqında çoxları
yazıb, söyləyib. Lakin həmin rəylər arasında ikisi mənim-
çün ən mötəbəridir. Onlardan biri məĢhur amerikan cər-
rahı, 1967-ci ildə dünyada ilk ürəkdəyiĢmə əməliyyatını
aparmıĢ Kristian Barnarda, digəri isə müasir Ġranın
Amerika və Avropada da yetərincə məĢhur, oralarda da
çox iĢləmiĢ cərrahlarından biri Məhəmmədhüseyn Mande-
qara məxsusdur.
Birincini professor Barnardın əlyazmasından oxumu-
Ģam, ikincini Ģəxsən professor Mandeqarın özündən eĢit-
miĢəm.
K.Barnard Keyptaunda onun yanında təcrübə keçmiĢ
Cavad Heyətə vətənə yola düĢməyə hazırlaĢarkən Ġranda
gələcəkdə ürək cərrahiyyəsi iĢinin daha yaxĢı qurulması
üçün köməkliklər göstərməsindən ötrü Ģaha bir məktub
göndərmək istəyir. Cavad Heyətə deyir ki, özün haqqında
mənim adımdan bir zəmanət məktubu yaz, imzalayım.
Cavad Heyət xəsis cümlələrlə çox təvazökar bir mətn
yazır. K.Barnard alıb baxır, baĢını bulayır, bəyənmir. Qə-
ləmi götürüb özü təzədən yazır. Məktubun surəti doktor
Heyətdə qalmıĢdı: "Ġran iftixar edə bilər ki, onun belə iste-
24
dadlı, qeyri-adi intuisiyalı, əsl qızıl əlli, dünya səviyyəli
cərrahı var".
M.Mandeqar isə Tehranda öz iĢ otağında Cavad Heyə-
tin rəfdəki fotosunu göstərərək gülümsündü: ―Doktor Ġran-
dakı ürək cərrahlığının atası olmaqdan daha artıq bizim
mürĢidimizdir, daimi ustadımızdır. Bəlkə, mindən çox
ürək əməliyyatı etmiĢəm, yenə, yeri gələndə, onun məs-
ləhətinə ehtiyacımız var".
Cavad Heyətin mahir cərrah barmaqları çox ürəklərə
çox tikiĢlər vurdu. Bununla ayrı-ayrı insanların ömrü
uzandı, ayrı-ayrı Ģəxslər nicat tapdı. Ancaq o, bir millət-
Ģünas kimi xalqının yaralarına tikiĢ vururdu, onun mədə-
niyyətinin, ədəbiyyatının, dilinin, tarixinin dünənindəki
cüda düĢmüĢ tikələri, parçaları bərpa edir, bir-birinə cala-
yır, tikiĢlər vurur və bu yolla bütöv millətin mərəzlərini
sağaltmağa çalıĢırdı.
2011-ci ildə Cavad Heyət seçmə əsərlərindən ibarət
növbəti kitabını nəĢrə hazırlayırdı. Əlyazmanı verdi ki,
gözdən keçirim və kitabın adı barədə düĢünməyimi də
təvəqqe etdi. Müxtəlif illərin məhsulu olan bir-birindən
qiymətli həmin məqalələri oxuyandan sonra təklif etdim
ki, kitabın ünvanı "Dilimiz, ədəbiyyatımız və kimliyimiz
uğrunda" olsun. Doktor razılaĢdı.
Əslində, həmin sərlövhə tək o kitabın yox, Cavad
Heyətin bütün yaradıcı və ictimai fəaliyyətlərinin devizi
sayıla bilərdi.
(Cavad Heyətin çoxyönlü araĢdırmalarının ümumi
səmtini niĢan verən bu baĢlığın onun özünə də çox ləzzət
verməsini mənə doktorun həyatının son 15 ilində ona lap
yaxın olmuĢ, bir növ, Ģəxsi katibi vəzifəsini yerinə yetir-
miĢ, ustadın son günlərində də xüsusi sədaqəti, fədakar-
lıqları ilə seçilmiĢ BaxĢəli Zülfi söylədi. Mən həmin
25
baĢlığı təklif edəndə Cavad Heyətin mənzilində üçümüz
birgəydik. Mən dedim, doktor dəftərinə qeyd etdi.
B. Zülfi danıĢır ki, doktorgilə az sonra növbəti gəli-
Ģimdə, görünür, mənim də o adın təklif edilməsi söh-
bətində iĢtirakımı unudaraq sevincək söylədi: ―Bax gör nə
gözəl addır! Ömrüm boyu ürəyimdən nə keçib, hamısı var
bu adda‖.
* * *
...Doktorun bir dəfə mənə gənclik illəri ilə bağlı nağıl
etdiyi xatirəsi təsdiqləyir ki, ondakı coĢqun milli qeyrət
duyğusu təfəkkürünün Ģəkilləndiyi, biliklərinin artdığı,
millətçi qayəsinin baĢlıca istiqamətlərinin müəyyənləĢdiyi
yetkinlik çağlarından xeyli əvvəl də varmıĢ, bu elə onun
iliyinədək hopmuĢ bir məziyyətmiĢ.
Hadisə vaqe olanda Cavad bəy 19 yaĢındaymıĢ.
Əslən Qafqaz türklərindən olan, sonralar MəĢhəddə
yaĢayaraq xeyli dəyiĢmiĢ, neçə illər də Tehranda məskun
olaraq təhsil aldıqdan sonra öz gerçək milli kökündən lap
aralanmıĢ bir cavan türklərin ünvanına həqarətli sözlər
danıĢıbmıĢ. Cavad bəy bunu eĢidincə tapır həmin oğlanı,
"filan qələti eləmisən" deyir.
Tanınan idmançı, güləĢçi olan həmin Ģəxs bir az da
gücünə qürrələnərək bu ucaboy, arıq oğlanın qarĢısından
qaçmır, "demiĢəm, əcəb eləmiĢəm" söyləyir. Cavad bəy
söz elə oğlanın ağzından çıxan kimi onu götürüb çırpır
yerə, çökür sinəsinə, baĢlayır döyməyə.
Ətrafdakılar adi bir adamın kəlləmayallaq elədiyi pəh-
ləvanı, hamının gözü qarĢısında biabır olmuĢ çempionu
Cavadın əlindən zorla alıb ayırırlar onları.
YaĢı səksəni ötmüĢ Cavad Heyət yada salır və təəc-
cüblənirdi: "Gəncliyimdə güclü olmağına güclü idim.
Amma o, peĢəkar idmançı idi, fənd, yol bilirdi, məndən də
canlı idi, bilmirəm necə oldu onun öhdəsindən gəldim".
26
Necə yəni necə! Bu həmin vulkan kimi püskürə bilən
millət eĢqidir ki, lazım gələndə insanı yalın əllə tankın da
üstünə Ģığıda bilir!
Və o təpər, o qırım, o sevda ömrü boyu Cavad Heyəti
tərk etmədi.
* * *
XX əsrdə o taylı-bu taylı Azərbaycanın 4 dərgisi olub
ki, onlar milli düĢüncənin formalaĢmasında, bütövlükdə
millət quruculuğunda möhtəĢəm izlər buraxmıĢdır.
XX əsrin əvvəllərində Mirzə Cəlillə Ömər Faiq Ne-
manzadənin "Molla Nəsrəddin"i, Əli bəy Hüseynzadənin
―Füyuzat"ı, XX yüzilin yetmiĢ-səksəninci illərində Anarın
―Qobustan"ı və Cavad Heyətin 1979-cu ilin aprelindən
üzü bu yana sıralanan ―Varlıq‖ı.
Məhəmmədhüseyn ġəhriyar elə "Varlıq" dərgisinin ilk
sayları oxucuyla görüĢəndə riqqətə gələrək ―Azadlıq quĢu
―Varlıq‖ Ģeirini yazıb:
Artıq 36 ildir ki, "Varlıq" Ġranda ana dilində nəĢr edi-
lir. Orada dərc edilən yazıların məzmunu, elmi səviyyəsi
hələ bir kənara qoyularsa, yalnız məcmuənin belə uzun
müddətdə milyonlarla insan arasında apardığı dil tərbiyəsi,
əyani məktəb olmaq qüdrəti oxĢarı olmayan qəhrəmanlıq
kimi dəyərləndirilməyə layiqdir və bütün baĢqa xidmətləri
olmasa belə, elə bircə bu dərginin 36 illik yoluna görə
Cavad Heyətə millətin könlündə və tarixin bağrında əbədi
abidə yapılması haqqı halaldır.
Həm də bu dərginin fasilələr vermədən, yarı yolda
qalmadan belə sürəkli zaman məsafəsində ayaq üstə
olması, təbii ki, ən əvvəl batılmaz Cavad Heyət zirehi,
onun qeyri-adi dərəcədə güclü nüfuzu, sözükeçərliyi ilə
əlaqədardır.
Necə bəsirətli, necə uzaqgörənmiĢ ustad!
27
Ġran Ġslam inqilabı baĢ verəndən sonra açılan azadlıq
pəncərəsi, ölkəni bürüyən yenilik havasının dalğasında
ayrı-ayrı təĢəbbüskarlar ana dilində yeni-yeni qəzet-jurnal
buraxmağa baĢladılar.
Ömrü bir neçə həftə olanı da oldu, bir neçə ay sürəni
də, bir neçə il çəkəni də. Ahəstə-ahəstə hamısı susdu, itib-
batdı.
Meydanda sabit əzəməti ilə dikələn yeganə "Varlıq"
oldu. Çünki tədbirli Cavad Heyət əvvəldən iĢini düzgün
qurmuĢdu. Yolunu baĢlayanda ətrafına ən sabitqədəm, ən
qabaqcıl yazarları, sözü və qələmi bütöv milli düĢüncə
daĢıyıcılarını toplamıĢdı – Həmid Nütqini, Savalanı, Sə-
həndi, Sönməzi (Kərim MəĢrutəçi), Fərzanəni...
Geridəki 36 il boyunca doktor dərgini sadiq köməkçi-
lərinin, dəstəyə yeni qoĢulan silahdaĢlarının dəstəyi ilə
buraxdı. Lakin bir baĢ redaktor və dəmir intizam sahibi
kimi sonacan da özü jurnalın hər sayını əvvəldən-axıracan
mütaliə edərək redaktələrini apardı.
Çünki Cavad Heyət bu iĢə sadəcə naĢirlik, jurnal
buraxmaq kimi baxmırdı.
Bunu öz həyat amalının, millət quruculuğuna, türk-
lüyə, azərbaycançılığa xidmətinin ümdə halqalarından biri
kimi qavrayırdı.
Lakin o həm də müəlliflərdən biri idi. Yeri düĢdükcə
xalq üçün taleyüklü məna kəsb edən və qələmə alınması
özəl qətiyyət tələb edən məsələlərlə bağlı ―Varlıq‖a
yazırdı.
36 illik silsilədə belə yazılar onlarcadır, səciyyəvi olan
bircəsinə diqqət yönəltsək yetər.
―Varlıq‖ın 1998-ci il qıĢ buraxılıĢında Cavad Heyət
qərəzli, yanlıĢ mülahizələr irəli sürən Məhəmmədhüseyn
Füruğinin ―Ġttilaat‖ qəzetinin bəhmən ayının 2-də (yəni 22
yanvarda. Bəhmən Ġran və Əfqanıstanın rəsmi təqvimində
28
on birinci aydır. QıĢın ikincı ayı olan bəhmən 21 yanvar-
da baĢlayıb 19 fevralda bitir) çıxmıĢ sayındakı ―Fars dilini
qoruyaq‖ adlı məqaləsinə cavab olaraq dərhal ötkəm bir
məqalə ortaya qoydu: ―Fars dilini qoruyaq, lakin Ġranın
türk və ərəblərinin də ana dilini əzməyək!‖
Doktor həmin müəllifin bütün yersiz iddialarını tutarlı
elmi dəlillərlə rədd edəndən sonra ittihamlı məqaləsini
belə yekunlaĢdırırdı: ―Ġran, islam və insaniyyət adına siz-
dən xahiĢ edirəm. Özünüz dediyinizə görə, ―vətənin hifzi
və müdafiəsində müqəddəs niyyət və məqsədiniz var‖.
ÇalıĢın öz milli fikir və əqidələrinizi bir daha nəzərdən
keçirin ki, islami vətənimizin bütün insanlarını yekdil
(birdilli yox) və həmrəy edəsiniz. Vəssalam!‖
Doktor Cavad Heyət doğulub boya-baĢa çatdığı Ġranı
sevirdi, bu ölkəni güclü görmək istəyirdi, hər dürlü bölü-
cülüyün əleyhdarı idi: ―Biz Ġranda otuz neçə faizik, həmiĢə
də ikinci yox, birinci dərəcəli vətəndaĢlar olmuĢuq‖, –
deyirdi.
Ona görə də öz dürüst vətəndaĢ və alim qənaətlərinə
güvənən, sabahabaxan (və həm də sabahıgörən) Cavad
Heyət kimin onun mövqeyinə necə reaksiya verəcəyinə
bənd olmadan saxta millətçilərin, dayaz siyasətçilərin ayı
xidməti göstərərək Ġranın bütövlüyünə, birlik gücünə xələl
gətirə biləcək bu qəbil sayıqlamalarına soyuqqanlı ayıq
cavabını heç vaxt gecikdirmirdi.
ġəhriyar milli düĢüncədə zəlzələ qoparan, fırtınalar
yaradan ―Heydərbabaya salam"ı doğurdu.
Həm fars, həm türkdilli ədəbiyyatın tarixini ayrıntıları
ilə bilən Cavad Heyət haqlı olaraq təsdiqləyirdi ki, bizim
iki və üçdilli Ģairlərimiz az olmayıb. Tutalım, Nəsimi,
yaxud Füzuli, ya Seyid Əzim hər üç dildə yazmıĢlar.
Onların farsca və ərəbcədə yazdıqları yaxĢıdır, lakin
29
türkcədə olan yadigarları Ģah əsərlərdir. ġəhriyarın isə həm
ana dilində, həm farsca qələmə aldıqları Ģah əsərlərdir.
ġəhriyarla ilk gənclik illərindən, hələ 1941-ci ildə
Tehranda birlikdə ali tibb təhsili aldığı vaxtlardan rəfiq
olan və bu simsarlığı Ģair dünyadan köçənədək kəsməyən
Cavad Heyət ona yalnız bənzərsiz söz ustası kimi baxmır-
dı. ġəhriyar Cavad Heyətdən ötrü həm də doktorun ömrü-
nün mənası olan azərbaycançılıq axınının, türkçülük cərə-
yanının gurlaĢmasına qida verəcək güclü nəhrlərdən idi.
ġəhriyarsa "Heydərbaba"nı doğurandan sonra səngi-
miĢdi, Təbrizdə yaĢayırdı, elə ara-sıra farsca yazıb-yara-
dırdı.
Bir dəfə Cavad bəy bu nisgili barədə o dövrdə Ġrana
tez-tez gedib-gələn görkəmli ĢərqĢünas Rüstəm Əliyevə
gileylənir.
Doktor etiraf edirdi: ―Rüstəm dedi ki, bunun təqsiri
sizdədir.
ġəhriyar qalıb orada tək, ətrafında sizin kimi aydınlar
yoxdur ki, onu coĢdursun, istiqamətləndirsin. Gətirin onu
Tehrana, qoy sizin, dostlarınızın əhatəsində olsun, təsi-
rinizlə yenə baĢlayacaq ana dilində təzə Ģeirlərini yaz-
mağa.
Ağlıma batdı bu fikir. Getdim Təbrizə, ġəhriyarı ailə-
silə birgə gətirdim Tehrana. Mənim üçmərtəbəli evim
vardı, bir mərtəbəsini verdim ona, elə onun təĢrifiylə
evimizdə öz-özünə bir ədəbi məhfil əmələ gəldi. Asta-asta
ġəhriyarın anadilli qələminin də pası açıldı, Ģirin dilimizdə
yeni-yeni Ģeirləri doğuldu".
(ġəhriyarın həmin Ģeirlərini oxuyanda müdam səbəb-
karı, nəcib Cavad Heyəti də anın!).
Cavad Heyət bunu da xatırlayırdı ki, bir gün Ģahın
həyat yoldaĢı Fərəh xanım xəbər yollayır ki, ġəhriyar izin
versin, Tehranda ona bir ev alaq, rahat yaĢasın.
30
ġəhriyarın müdrik cavabını doktor mənə illər fasilə-
siylə müxtəlif məqamlarda bir neçə dəfə ərz edib və hər
dəfə də qəhərlənib: "ġəhriyar qayıtdı ki, çox təĢəkkür
edirəm diqqətinizə görə. Mənim hələ burada yerim çox
rahatdır. Amma mənə nəsə yaxĢılıq etmək istəyirsinizsə,
türkcə Ģeirlərimi ayrıca kitab halında buraxın, elə özüm
onun puluna ev də alaram".
...ġahlıq zamanı idi və təbii ki, həmin arzulanan kitab
buraxılmadı.
* * *
Cavad Heyətin insanlara, Ģəxsiyyətlərə münasibətinin
əsas məhək daĢı, baĢlıca ülgüsü Azərbaycana, onun tari-
xinə, dilinə, ədəbiyyatına, mədəniyyətinə, mənəviyyatına
sevginin dərəcəsi idi.
Unudulmaz Heydər Əliyevi çox sevirdi və ulu öndərin
də ona xüsusi ehtiramı vardı.
Onillər ərzində neçə-neçə dövlət baĢçısı tərəfindən
dəfələrlə səmimi qəbul edilmiĢ, müsahib olmuĢ doktor yeri
düĢdükcə dilə gətirirdi ki, ədəbiyyata, mədəniyyətə, mə-
nəvi sərvətlərə həssas, xeyirxah münasibətdə və bütün
bunları peĢəkarcasına bilməkdə Heydər Əliyevə tay ola
biləcək ikinci dövlət rəhbəri ilə rastlaĢmayıb.
―Hər görüĢəndə onun zəkasından, mütəfəkkirliyindən,
nitqindən zövq alırdım, onun Azərbaycan eĢqinə heyran
olurdum, ayrılmaq istəmirdim və hiss eləyirdim ki, Heydər
Əliyev də bu görüĢlərin tez baĢa çatmasını istəmir. Elə
oğlu da əsl ona layiq, eynən onun xəttinin, yolunun yol-
çusudu.
Bir neçə dəfə mən Heydər Əliyevlə görüĢəndə Ġlham
Əliyev də yanımızda olmuĢdu. Amma sakitcə dinləyir,
kəlmə kəsmirdi. Üstündən xeyli müddət keçdi.
31
Ġlham Əliyev Prezident oldu, onun bir-birindən çəkici,
elə atasınınkı kimi cazibədar nitqlərini eĢidəndə mat qal-
dım ki, bu qabiliyyətlər harada gizlənibmiĢ. Növbəti dəfə
görüĢəndə özündən xəbər aldım ki, Ġlham bəy, atanızın
yanında Sizi həmiĢə dinləyən gördüm, nədən bir dəfə də
səsinizi eĢitmirdim? Cavab verdi ki, bizdə adətdir, böyük
danıĢanda söhbətə müdaxilə etməzlər, qulaq asarlar, yadda
saxlayarlar, öyrənərlər".
Bu davranıĢ tərzi, belə cavab özü də klassik kübar
tərbiyəsi ənənələri olan ailədə böyümüĢ Cavad Heyəti son
dərəcə məmnun qoymuĢdu.
Məni isə dövlət baĢçımızın Cavad Heyəti daha çox
bakılı etməsi, buralara hərdən qonaq kimi deyil, elə gələ-
rək uzun müddət də qalması, insanlarımızla, ziyalıları-
mızla daha çox ünsiyyətdə olması üçün ona paytaxtımızın
mərkəzi hissəsində qəĢəng mənzil hədiyyə etməsi çox
məmnun qoymuĢdu.
Amma Prezident Ġlham Əliyevlə doktor Cavad Heyətin
təmaslarının bir millətəxeyir saxlancı da var.
Doktor ölkə baĢçısına farsca yazdığı, Ġranda 1986-cı
ildə nəĢr edilmiĢ fundamental "Türk dilləri və ləhcələrinin
tarixi" əsərindən bəhs etmiĢdi, Prezident Ġlham Əliyev də
dərhal əsərin milli çəkisini, faydalılığını tutmuĢ və bir
iradını da bildirmiĢdi: ―Farsca yazıb nəĢr etmisiniz, çox
yaxĢı. Amma türk dillərinin müqayisəli təhlili haqda belə
sanballı kitab gərək Azərbaycan dilində də buraxılsın".
Cavad Heyət dəqiqləĢdirirdi: ―Ġlham bəyin bir töv-
siyəsi də oldu. Kitab çox qalın idi. Cənab Prezident söy-
lədi ki, bu, dərslik kimi bir mənbədir. YaxĢı olardı ki,
rahat oxunsun deyə siz onu çox qalın bir kitab kimi yox,
iki cilddə buraxasınız".
32
Bu arzu da nəzərə alındı, kitab çıxdı, Azərbaycanın və
türk dünyasının elmi ictimaiyyəti arasında geniĢ əks-səda
da doğurdu.
(Həmin əsərin ölçüyəsığmaz qiymətliliyini anlamaq-
çün dünyaca məĢhur bir dilçinin Ģəhadəti yetər. Türk
dillərinin görkəmli tədqiqatçısı, Göttingen Universitetinin
―Türkologiya və altayĢünaslıq kafedrası‖nın müdiri olmuĢ
professor Gerhard Dörfer (1920-2003) 1987-ci ilin 21
noyabrında Cavad Heyətə məktubunda yazırdı: ―Ankarada
möhtərəm yoldaĢım Həsən Ərən Sizin son dərəcə böyük
əhəmiyyətə malik ―Tarix-e zəban o ləhceha-ye torki‖
kitabınızı mənə göstərdi. Bu kitab mənə çox xoĢ gəldi.
Əzəmətli bir əsərdir‖).
Və Prezident Ġlham Əliyevin xeyir-duası ilə böyük
alim Cavad Heyətin ana dilində iki cilddə nəfis Ģəkildə
iĢıq üzü görmüĢ həmin Ģah əsərinin ilk səhifəsində bir
ithaf da var: ―Bu əsəri türk olmadığına baxmayaraq,
saatlarca yalnızlığa dözən və mənim rahatlıqla bu kitabı
ərsəyə gətirməyimə imkan yaradan sevgili həyat yoldaĢım
Fəridə xanıma ithaf edirəm".
Əziz ustad, vəfalı ömür yoldaĢınız, fars qızı Fəridə
xanımın da, 5 qızınızın da, Sizi sevən, çox əziz bilən
dostlarınızın da, millətimizin də Sizsizliyin yalnızlığına
daha saatlarla deyil, əbədi dözmək növbəsi gəlib çatdı.
Nə qısa imiĢ 90 il!
Ġndi ilğım kimi əlçatmaz, ünyetməz vaxt uzaqlarında
qalan 1936-cı ildə, baĢlanğıc məktəbi bitirərkən Ġran
Azərbaycanındakı yaĢıdlarınız arasında Sizi üç ən güclü
öyrəncidən biri kimi qiymətləndirmiĢdilər və mükafat
olaraq Sizə dahi Hafizin ―Divan‖ını hədiyyə etmiĢdilər.
O kitabdakı Ģeirlər əzbərinizdə və həmin kitab onil-
lərcə yanınızda oldu.
33
Və o Ģeirlər, o kitab kimi qata-qatar göyçək qoĢqular,
sıra-sıra həmiĢədiri cildlər daimi hayanınıza, həmsöhbə-
tinizə, məhrəminizə çevrildi.
2009-cu ildə təmir və yenidənqurmadan sonra yenidən
açılmıĢ Nizami Gəncəvi adına Milli Azərbaycan Ədəbiy-
yatı Muzeyinə, mənim iĢ yerimə qonaq gəlmiĢdiniz.
TamaĢa etdiniz və axırda YaddaĢlar kitabında unudulmaz
cümlələr yazdınız: ―Bura tamaĢa etmək yox, burada yaĢa-
maq lazımdır‖.
Siz elə bütün həyatınızı o söz nəhəngləri ilə birgə
yaĢamadınızmı?
Sizin üçün əsl cənnət gözəl sözlərin əsrarəngiz, füsun-
kar aləmi, Sizdən ötrü gerçək behiĢt xalqın qəlbi idi.
HəmiĢə həm orada, həm buradasınız.
Sağlığınızda da belə idi, cismən Sizsiz qalacağımız
illərin hamısında da belə olacaq.
...Bir neçə gün öncə xəstəxanada yanınızdaydım. Ġlk
dəfə kostyumsuz, qalstuksuz, beretsiz görürdüm Sizi. Ya-
taqdaydınız.
Ömür tükənirdi. Damarlarınıza tibb qurğuları qoĢul-
muĢdu.
Əllərinizi sığallayırdım, danıĢırdım Sizinlə. EĢidirdi-
niz, həyəcanınızı hiss edirdim. Nəsə deyirdiniz, amma
səsiniz çox dərində idi, zəif idi, eĢidilmirdi.
Cavad Heyət həqiqəti isə baĢqadır axı!
Millət iftixarının ucadan-uca səsi eĢidilməyə bilərmi
heç!
Sizin doğma səsiniz həmiĢə bizimlə olacaq. Bizə və
bizdən sonra gələn çox-çox nəsillərə eĢidiləcək!
...YaĢı 70-i, lap 80-i aĢandan sonra belə Cavad Heyət
hərdən əllərini yuxarı qaldırıb irəli uzadaraq 10, 20, 30
dəqiqə heykəl kimi hərəkətsiz saxlaya bilirdi və vurğu-
layırdı: ―Gərək cərrahın əlləri titrəməsin‖.
34
Ömrü boyu doktor Cavad Heyət qorxmaz oldu, məğrur
oldu, mərd oldu, mübariz oldu və heç vaxt əlləri titrəmədi.
Nə o əllər cərrah bıçağı tutanda, nə də alim, yazıçı
qələmindən yapıĢanda.
Heç vaxt heç kimə əyilmədi, həmiĢə düz sözünü, haqq
sözünü deməyi bacardı.
Amma bir cüt əl vardı ki, hərdən loğman Cavad Heyət
sayğıyla, məhəbbətlə, minnətdarlıqla onları öpdü.
―Hərdən uğurlu cərrahiyyə əməliyyatı aparıb bir insa-
nın həyatını xilas edəndə, bəzən yüksək əhəmiyyətinə
inandığım bir yaxĢı yazı yazanda öz əllərimdən öpmüĢəm.
Axı onların da Ģəfqətə, nəvaziĢə, təĢəkkürə ehiyacı var‖.
Bu, doktor Cavad Heyətin sözləridir.
Vətən və millət yolunda can qoymuĢ qüdrətli övladlara
da, əlbəttə ki, daim minnətdarlıq ifadə etməli, onlara yur-
dun borcunu qaytarmaq haqqında hər zaman düĢün-
məliyik.
Cavad Heyətlə bağlı ilk belə etibar, vəfa məqamı
2014-cü ilin qızmar avqust günlərində yarandı.
...Azərbaycanın Məkkəsi və Mədinəsi bildiyimiz Təb-
rizdə və Bakıda and yeri sayılası müqəddəs məkanlarımız
var: Təbrizdə "Məqbərət üĢ-Ģüəra", Bakıda Fəxri xiyaban.
Bu ziyarətgahlarda bəxtinə əbədi sönməzlik düĢmüĢ
Azərbaycan ulduzları uyuyur.
"Heyət" sözünün də daha bir anlamı "nücum", "ulduz-
lar elmi"dir.
Yurdumuzun ən elmli ulduzlarından olan böyük
azərbaycanlı Cavad Heyətin əsl yeri həmin kəhkəĢanlardır.
Elə özünün də son arzusu bunlardan birində rahatlıq
tapmaq idi. Neyləyək ki, umduğu sonacan alınmadı. Üç
nigaran gün yaĢadıq. Təbrizi ona qıymadılar. Bakı Cavad
Heyətə ağuĢunu açdı...
35
Amma sevimli doktor, haçan Sizə çox layiq olan
Birinci Fəxri xiyabana getsəm, nə vaxt "Məqbərət üĢ-
Ģüəra"ya yolum düĢsə, mehriban surətinizi onların ikisində
də ruh qardaĢlarınızın arasında görəcəyəm.
Və bir də, sevimli millətimizin indikindən də qat-qat
məsud olacağı daha parlaq gələcəklərin qoynunda.
Əsərləriniz, əməlləriniz yaĢayacaq, daim yurddaĢ-
larımıza vətənçilik dərsləri, millətçilik öyüdləri verəcək,
həmiĢə qanı təzələyəcək, ruhu duruldacaq, Sizi də bitməz
sevgilərə ünvan edəcək.
VARLIĞınız yenilməz milli ruhun rəmzlərindən biri,
VARLIĞınızın qovuĢduğu yaĢarı əsərlərinizin hamısı
birbaĢa xalqın qan damarına qoĢulu.
Azərbaycanla birgə sonsuzadək diri qalmaqçün baĢqa
nə lazımdır ki?!
...Sizi torpağa tapĢıracağımız 15 avqustdan əvvəlki
gecə mənə bağıĢladığınız kitablarınızı yenə vərəqləyirdim,
hansısa səhifələrdə xeyli dayanmalı olurdum, oxuyurdum,
düĢünürdüm, yenə fəxr edirdim, yenə heyran qalırdım.
Və bu ölməz səhifələri yaratmıĢ, daha heç vaxt toxuna
bilməyəcəyim əlləri xiffətlə xəyalən öpürdüm.
Əziz ustad, bir vaxtlar Sizin də öpdüyünüz əlləri.
Doktor Cavad Heyətin qadir əllərini!..
Dostları ilə paylaş: |