b) qravitasiya suları – süxurların məsamə və boşluqlarını dolduraraq sərbəst hərəkət etmə qabiliyyətinə malikdir (su hidrostatik təzyiq nəticəsində hərəkət edir). Bu suların hərəkəti səthi gərilmə və kapillyar qüvvələrdən asılı olmayaraq yalnız cazibə qüvvəsinə tabedir.
4. Kimyəvi əlaqəli su – belə sular süxurları təşkil edən bir çox mineralların tərkibinə molekula (H2O), ionlar (H+) və (OH–) və H3O kimi daxil olaraq onların kristallik şəbəkəsinin əmələ gəlməsində iştirak edirlər. Məsələn: CaSO4⋅2H2O – gips, soda – Na2CO3⋅10H2O, mirabilit (qlauber duzu) – Na2SO4⋅10H2O. Kimyəvi əlaqəli sular başqa mineralların tərkibində – opalda (SiO2⋅H2O), mikada, talkda və s. mövcuddur və bu sular yalnız yüksək temperatur şəraitində mineralın tərkibindən ayrılır, onun kristallik şəbəkəsi pozulur, maddə isə tam başqa şəklə çevrilir.
Akademik D.S.Belyankin kimyəvi əlaqəli suları üç növə ayırır.
