Pol Anri Holbaxa (1723-1789) görə, materiya, təbiət hər şeyin səbəbidir və materiya əbədidir, hərəkətdədir. Materiyanın hərəkəti onun mövcudluğunun zəruri nəticəsidir. Ateizm mövqeyində olan filosofa görə, dinə qarşı ən effektiv mübarizə maarifçiliyin vüsət almasıdır. Əsas əsərləri “Sağlam düşüncə", "Təbiətin sistemi", "İfşa edilmiş xristianlıq","Cib ilahiyyatı"dır. Onun fikrincə, insan təbiətin bir hissəsidir və ondan mütləq dərəcədə asılıdır.
Deni Didronun (1713-1784) əsas əsərləri "Fəlsəfi düşüncələr" və "Korların məktubu və gözlülərə nəsihət"dir. O mariflənmiş monarxiya tərəfdarı idi və hesab edirdi ki, siyasi və əxlaqi məsələlərdə xalq kütlələrinə arxalanmaq olmaz. Ən populyar deyimi “pilləkəndəki ağıl”dır. Yəni, insanın ağlına sonradan gələn fikri (həmsöhbət ilə otaqdan çıxdıqdan sonra pilləkəndə) daha faydalı olandır.
O Böyük Fransa inqilabının ideoloqlarından biridir. Didronun 6 əsəri XX və XXI əsrlərdə ekranlaşdırılıb və bədii filmlər kimi xeyli populyardırlar.
Fransua Volter (1694-1778) təbii hüquq nəzəriyyəsinin tərəfdarı kimi insanın yaşamaq, mülkiyyət və azadlıq hüquqlarının təmin olunmasını vacib sayırdı. Fransız maarifçiliyinin əsas simalarından biri olan Volter o dövrün elmi nailiyyətlərinə istinad edərək dinin əleyhinə çıxırdı. Din nümayəndələrini və kilsə ehkamlarını tənqid edərək deizm mövqeyində dayanmışdır.
Volter cəmiyyətdə bərabərliyin əleyhinə çıxır və xalqın cəmiyyət işlərinə müdaxiləsinə qarşı olmuşdur. Onun fikrincə ziyalılar, xüsusən filosoflar dövlət idarəçiliyində daha çox iştirak etməlidirlr.
Klod Adrian Helvesi(1715 -1771) əxlaq haqqında elm yaratmaq istəyirdi. İnsanın ehtiraslarının cəmiyyəti irəli aparan qüvvə hesab edirdi. Belə ki, insanın özünə vurğunluğu onun ehtiraslarını (maraqlarını, xoşbəxtliyə can atmasını) formalaşdırır. O sosial mühiti insanın formalaşdıran əsas amil kimi qiymətləndirirdi. İnsanı təbiətin bir hissəsi hesab edir, hər cür biliyin təcrübədən yarandığını əsaslandırırdı.