Tabiiy fanlar fakulteti botanika kafedrasi

FOTOSINTETIK FOSFORLANISH. Yashil o‘simliklarning muxim xususiyatlaridan biri quyosh energiyasini to‘g‘ridan-to‘g‘ri kimyoviy energiyaga aylantirishdir. Xloroplastlarda yorug‘lik energiyasi xisobiga ADF va anorganik fosfatdan ATF hosil bo‘lishi fotosintetik fosforlanish deyiladi. YOrug‘likda bo‘ladigan fosforlanishni 1954 yilda D.I.Arnon va uning shogirdlari kashf etdilar. YAshil o‘simliklarda fotosintetik fosforlanishning mavjudligi juda katta ahamiyatga ega. CHunki hosil bo‘ladigan ATF molekulalari hujayradagi eng erkin kimyoviy energiya manbaidir. Har bir ATF molekulasida ikkita makroergik bog‘ mavjud. Ularning har birida 8 -10 kkal energiya bor. Makroergik bog‘larning uzilishi natijasida ajralgan kimyoviy energiya hujayradagi reaksiyalarda sarflanadi. Xloroplastlardagi yorug‘likda fosforlanish reaksiyalari ikki asosiy turga bo‘linadi:

1) Siklli fotosintetik fosforlanish;

2) Siklsiz fotosintetik fosforlanish.

Birinchisida xlorofill molekulasi yutgan va samarali hisoblangan barcha yorug‘lik energiyasi ATF sintezlanishi uchun sarflanadi. Quyoshning yorug‘lik energiyasini yutgan xlorofill qo‘zg‘algan holatga o‘tadi va uning molekulasi elektronlar donori sifatida yuqori energetik potensialga ega bo‘lgan tashqi kavatdagi elektronning chiqarib yuborilishi natijasida xlorofill molekulasi musbat zaryadlanib qoladi. Qisqa muddat ichida (10^-8 = 10^-9 soniya) elektron ma’lum elektron o‘tkazuvchi (ferredoksin va sitoxrom oqsillari) tizim orqali ko‘chirilib, musbat zaryadli dastlabki xlorofill molekulasiga qaytadi. Bu yerda xlorofill akseptorlik vazifasini bajarib, yana tinch holatga o‘tadi. Xloroplastlarda bu jarayon siklli ravishda takrorlanib turadi. Elektron harakati mobaynida energiyasi ATF sintezlanishiga sarflanadi. Natijada birinchi fotosintetik tizimdagi har bir xlorofill molekulasi yutgan bir kvant energiya hisobiga ikki molekula ATF sintezlanadi.

Siklsiz yorug‘likda fosforlanishda ATF sintezi bilan bir qatorda suv fotolizi sodir bo‘ladi. Natijada molekulyar kislorod ajralib chiqadi va NADF qaytariladi, ya’ni fotosintezning yorug‘lik bosqichidagi reaksiyalar tizimi to‘la amalga oshadi. Bu reaksiyalarda ishtirok etadigan elektronlarning ko‘chirilish yo‘li siklli fotosintetik fosforlanish jarayoniga nisbatan ancha murakkab. Umuman, yorug‘likda fosforlanish mexanizmi murakkab hususiyatga ega bo‘lib, uning muhim tomonlaridan biri elektronlarning ko‘chishida ishtirok etadigan oraliq moddalardir. Bu moddalardan plastoxinon, plastotsianin, sitoxromlar va ferredoksinning xususiyatlari ancha yaxshi o‘rganilgan. Lekin elektronlar harakati xududlarida hali aniqlanmagan moddalar ham bor. Xlorella bilan o‘tkazilgan tajribalar natijasining ko‘rsatishicha, yorug‘likda fosforlanish jarayonida hosil bo‘lgan umumiy ATF miqdoriniig 70-80 foizi siklik va 20 foizi siklsiz fotosintetik fosforlanishning maxsuloti ekan. Lekin yashil o‘simliklarda bu nisbat boshqacha ham bo‘lishi mumkin.