Universal hüquq varisliyi kimi vərəsəliyin birinci xarakterik əlaməti ondan ibarətdir ki, o, həmişə bilavasitə (vasitəsiz) xarakterə malik olur. Bu o deməkdir ki, miras qoyanın hüquq və vəzifələri vərəsələrə hər hansı üçüncü şəxsin iştirakı və vasitəçiliyi olmadan birbaşa, düzünə keçir. Bu hüquq və vəzifələrin vərəsələrə verilməsi üçün hər hansı üçüncü şəxsin əlavə hərəkət etməsi tələb olunmur. Sadəcə olaraq mirası qəbul etmək kimi hərəkətlə, vərəsə ölən şəxsin bütün hüquq və vəzifələrini əldə etmiş olur.
