İmtahan Sualları Pedaqogika elminin təşəkkülu və inkişafı

3. Pedaqogikanın əsas sahələri başqa elmlərlə əlaqəsi.
Əsas sahələri Bildiyimiz kimi, elmin müəyyən qollara bölünməsi şərtidir və gerçəkliyin daha dərindən öyrənilməsinə xidmət edir.
Məktəbəqədər pedaqogika. O, uşaqların anadan olandan 6 (altı) yaşına kimi (ailədə və məktəbəqədər müəssisədə) tərbiyəsindən bəhs edir. O, aşağıdakı problemləri: a) məktəbəqədər yaşlı uşaqların tərbiyəsinin vəzifələrini, onların inkişafının qanunauyğunluqlarını və tərbiyəsinin əsas xüsusiyyətlərini; b)məktəbəqədər yaşlı uşaqların əqli, əxlaqi, fiziki, estetik, əmək, ekoloji və s. tərbiyəsinin elmi əsaslarını, məzmununu, metodlarını; c)məktəbəqədər təhsilin nəzəri əsaslarını, onun məzmun, metod və təşkilini; ç) uşaqların fəaliyyət növlərinin məzmununu və elmi əsaslarını, onların qabiliyyətlərinin və güclərinin hərtərəfli inkişafına, həm də şəxsiyyət kimi formalaşmasına yönəlmiş rəhbərlik metodlarını; d)ailə tərbiyəsinin elmi əsaslarını, ailədə uşaqların tərbiyə şəraitinin spesifikası və təyin olunan xüsusiyyətlərini; e)pedaqoji prosesin təşkilinin elmi əsaslarını və s. öyrənir.
Ümumi pedaqogika. Bu, insan tərbiyəsinin ümumi qanunauyğunluqlarını öyrənən, bütün tərbiyə müəssisələrində tədris-tərbiyə prosesinin ümumi əsaslarını işləyib hazırlayan əsas elmi fəndir.Ənənəvi olaraq ümumi pedaqogika dörd böyük bölmədən ibarətdir: -ümumi əsaslar; -didaktika (təlim-təhsil nəzəriyyəsi); -tərbiyə nəzəriyyəsi; -məktəbşünaslıq.
Orta ixtisas məktəbi pedaqogikası. Müxtəlif quruluşlu, müxtəlif müddətli texnikum və gimnaziyalarda təlim-tərbiyə imkanlarını araşdırıb üzə çıxarır, onları ümumiləşdirib müəyyən istiqamətdə köməklik göstərir.Ali məktəb pedaqogikası. Ali təhsil müəssisələrində təhsil alanların təlim-tərbiyəsi, təhsili və psixoloji inkişafını, yəni bütövlükdə pedaqoji prosesi öyrənir.Əlahiddə pedaqogika (korreksion). Qüsurlu, habelə psixikasında müəyyən dəyişiklik olan uşaqların təlim-tərbiyəsindən, onların xüsusiyyətlərindən, biliklərin aşılanma imkanlarından bəhs edən pedaqogikadır. Əlahiddə pedaqogika bir neçə qola ayrılmışdır: a)surdopedaqogika–eşitmə və nitq məhdudiyyəti olan uşaqların təlim-tərbiyəsindən bəhs edən; b)tiflopedaqogika-görmə məhdudiyyəti olan uşaqların təlim-tərbiyəsindən bəhs edən; c)oliqofreno pedaqogika-əqli məhdudiyyəti olan olanların təlim-tərbiyəsindən bəhs edən.